Footer

20% laeng dagiti consumers a delingkuente nga agbayad: Cabugao Waters

CABUGAO, Ilocos Sur – Kalpasan ti immun-una a pakaammona iti naglabas a session ti konseho ditoy a 40% kadagiti agus-usar iti danum ditoy nga ili ti delingkuente nga agbaybayad, adayo a nababbaba itan ti bilang nga ibagbaga ti pannakabagi ti Cabugao Waters a saan nga agbaybayad iti makunsomoda iti danum.

Iti session ti konseho ditoy itay lawasna, kinuna ni Raquel Ancheta a 20% laeng dagiti consumers ti water district ditoy ti delingkuente nga agbaybayad iti makunsomoda a danum, kas panagbueltana iti immun-una nga imbatadna iti session dagiti konsehal ditoy a 40% dagiti consumers ti Cabugao Waters ti delingkuente nga agbaybayad iti billda iti danum.

Iti immun-una nga idadatagna iti konseho, inannugot ni Ancheta bayat  ti panagsaludsod dagiti konsehal nga iti agdagup a 1,469 a consumers ti Cabugao Waters, agdagup laeng iti 60 porsiento dagiti natulnog nga agbaybayad iti makunsomoda a danum.

Nupay kasta iti dayta a session, imbaga ni Ancheta a pattapattana laeng daytoy ta awan ti naikuyogna a listaan dagiti consumers ti Cabugao Waters.

Iti immuna a pattapatta,  aganay a 600 dagiti consumers ti delingkuente nga agbayad iti water billda.

Ngem iti kaudian, mapattapatta a 300 manipud iti nasurok a 1,500 a consumers ti delingkuente nga agbaybayad iti water billda.

Kasta met a nagkiddaw ni Ancheta a maikkanda iti gasoline allowance tapno sumaysayaat ti panagsingirda iti bayad ti danum nangruna iti eastern barangays.

Segun ken ni Ancheta, manipud pay idi 1997, awan ti nait-ited a gasoline allowance kadakuada.

Ingunamgunam ni Vice Mayor Rex Morales ti panagiwaras ti  Cabugao Waters iti notice a maputolan iti linia dagiti delingkuente a consumers tapno mapilitda nga agbayad.

Immun-unan nga imbatad ni Vice Mayor Rex Morales a kasano a maipangato ti singir ti danum no di pay masingir a nasayaat ti Cabugao Waters ti minimum a bayad ti danum manipud kadagiti consumers.

Kinuna ni Morales a kanuno-nganna ti water rate increase no 90-100% ti koleksion ti Cabugao waters kadagiti consumers.

Sagudayen ti gakat a naidatag iti konseho ditoy a maipangato ti singir iti danum iti P100 kada 10 cubic meters ken P8 kada 10 cubic meters nga excess.

Immutang ti gobierno munisipal ditoy iti P30 milion para iti expansion ti Cabugao Waters para iti nasaysayaat a serbisiona kadagiti consumers.

Iti maysa nga interbiona iti radio, kinuna ni Mayor Dio Caesar Suero a kabaelan ti gobierno munisipal a bayadan daytoy nga utangna babaen ti mabingayna iti internal revenue allotment.

Kinuna dagiti konsehal nga ipakat a siiinget ti Cabugao Waters ti panagputol iti linia ti danum dagiti delingkuente a consumers idinto nga inyunay-unayda a saan a patien dagiti staff ti water district dagiti consumers a mangibaga a garantiaan dagiti konsehal.#

Comments are closed.