Footer

EDITORIAL: Ti eskandalo a pinarnuay dagiti euro generals

Dinawat ti Philippine National Police iti kapolisan a saanda a maapektaran iti eskandalo a pinarnuay ti pannakasukal iti minilion a kuarta iti ikut ti maysa kadagiti heneral a timmabuno iti 77th International Police (Interpol) General Assembly a naangay iti St. Petersburg, Russia.

Nadetene ni retired Director Eliseo dela Paz, dati a PNP comptroller, iti airport ti Russia gapu iti kaadda iti ikutna ti nakurang a P7 milion a kuarta  a “contingency fund” a saanna nga indeklara iti imigrasion idi simrekda iti nasao a pagilian.

Ngem ti problema ditoy, agdagup laeng iti P2.3 milion ti budget ti delegasion a buklen ti walo a heneral a timmabuno iti nasao a asemblea ti impalgak ni DILG Secretary Ronaldo Puno nga inaprobaranna.

Sumangkautro, naammuan pay nga inkuyog dagiti heneral dagiti asawada nupay impettengda a nagtaud iti bulsada ti pinagpleteda. Nairaman iti contingent ti asawa ti agdama a hepe ti PNP.

Limtuad pay a naikkan ti PNP contingent iti aginaldaw nga allowance a sag-P21,418 idinto a P11,450 ti maipalubos iti inaldaw kas maibatay iti index ti allowance manipud iti United Nations Development Programme (UNDP) ken iti sanguanan ti  kinarigat ti panagbiag a sangsanguen ti pagilian gapu iti krisis a pinansial iti sangalubongan.

Rumbeng a lawlawagan daytoy dagiti agtuturay ti PNP agsipud ta dakkel a mantsa iti imahe ti pagilian ti ginubuayna ken iti posible nga epektona iti morale ti kapolisan.

Narigat a patien  ti ibagbaga ti spokesman a saan a maapektaran ti morale ti kapolisan gapu iti napasamak nga eskandalo. Agpayso, awan pay ti mangeg a reaksion manipud kadagiti junior officers agingga iti kababaan iti ranggo a polis ngem kastay kunada, makabibineg ti kinasilensioda.

Adayo a napegpeggad ti awan a mangeg nga areng-eng agsipud ta siulimek a maur-urnong daytoy iti lansad ti barukong ket iti panaglippiasna,  agpeggad nga agbettak a kas iti bulkan a nabayag a nailibay.

Saan koma a kideman dagiti nangangato nga agtuturay ti PNP a kangrunaan nga areng-eng dagiti polis ti kabassit ti sueldoda, ti kakurang dagiti armas nga aramatenda iti sanguanan ti riribuk iti Mindanao, problema ti insurhensia, ken panagraira ti krimen iti pagilian.

Lehitimo dagitoy nga areng-eng dagiti polis. Dagitoy dagiti kangrunaan a problemada a kayatda a maikkan iti naan-anay nga imatang ken pannakaasikaso.

Adu dagiti kasapulan nga ipalawag ni dela Paz. Ti problema, ni anniniwanna di nakita iti hearing nga inangay ti komite ni Sen. Myriam Santiago. Sa ita, nagkamang iti Korte Suprema a mangkuestionar iti pammilin ti senadora a maaresto.

Dakkel ngarud a pakasuotan iti liderato ni PNP chief Versoza daytoy nga eskandalo. Kasapulan a kredible ti resulta ti imbilinna a nainget nga inbestigasion, awan ti cover-up ken pananglilibeg ket no adda naglabsingan ni dela Paz, maipakat kenkuana ti pannusa kas maiyalubog iti linteg.

Ala, makitanto no ania ti pagbanagan daytoy nga eskandalo.#

Comments are closed.