Footer

Ilocos Sur, best implementor iti poverty reduction program iti Region I

VIGAN CITY – Iti maikadua a gundaway, inyalat ti gobierno probinsial ti pammadayaw a “best implementor of poverty reduction program”.

Segun ken ni Provincial Social Welfare and Development Officer Joey Concepcion, awaten ti gobierno probinsial babaen ken ni Gov. Deogracias Victor “DV” Savellano ti nasao a pammadayaw iti seremonia a maangay iti San Fernando City inton Oktubre 29.

Inatiw ti Ilocos Sur dagiti dadduma a probinsia iti Region I gapu kadagiti ipatpatungpalna a programa a pangrupak iti kinapanglaw kas iti Kakailian nga Agnaed ti Barangay Sangsangkamaysa nga Agrang-ay Tayo (KABSAT), Ilocos Sur Hotline, LCS Amor, BaRang-Ay demo farm ken dagiti summit nga insayangkat ti gobierno probinsial tapno mapaadu ti apit dagiti agmulmula iti mais ken tabako ken dadduma pay.

“Adu dagiti makon-conceptualized ni Apo Gobernador a napintas a programa a mangpasayaat iti biag dagiti kaprobinsiaantayo nangruna kadagiti less privileged,” kinuna ni Concepcion. 

Dinakamat ni Concepcion  ti Ilocos Sur Hotline a maysa a nangabakan ti probinsia gapu “ta sabsabali daytoy nga istratehiatayo, ditoy probinsia laeng, saan a makita iti sabsabali a probinsia” ken  adda sustainability daytoy a programa.”

Kinunana a dakkel ti impact ti KABSAT outreach program agsipud ta nai-localize ti gobierno probinsial ti Kalahi program ti nasional a gobierno.

Innayonna nga iti Kalahi program, maysa laeng a depressed barangay ti matutokan a maserbian ngem iti KABSAT, agkakaparanget a barbarangay dagiti identified a munisipalidad ti maikkan iti serbisio idinto nga inyunay-unayna a “purely” nga initiatibo daytoy ti gobierno probinsial.

“Makitatayo pay ti napigsa a suporta dagiti nadumaduma a probinsial ken nasional nga ahensia ti gobierno,” kinuna ni Concepcion.

Kinuna ni Concepcion a dinayaw dagiti evaluators dagiti initiatibo a programa ti gobierno probinsial iti panangidaulo ni Gov. Savellano tapno mapapintas ti kalidad ti panagbiag dagiti agindeg ditoy probinsia.#

Comments are closed.