Footer

Kapitan, naireport a nagpaputok

STA. LUCIA, Ilocos Sur – Maysa a kapitan ti barangay ti naireport iti polis a nagpaputok.

Ngem segun ken ni Burgos Barangay Captain Roland Bodaño, nagpaputok iti paltogna tapno ballaaganna ni Ronald  Manzano, 39, kalugaranna, gapu iti panangprobokar daytoy kenkuana.

Naammuan iti inisial nga imbestigasion dagiti polis a pinagsasawan ni Manzano ti kapitan ken ti kabsatna idi lumabasda a nakalugan iti dyip iti sango ti balay daytoy.

Mapapati a simmaruno ni Manzano kadakuada sa kinaritna ti kapitan ket maipagarup nga adda innalana a paltog iti motorsiklona.

Nagpaputok metten ti kapitan. Adda lisensia nga imparang ti kapitan idi biroken dagiti polis.

Nagtabla iti butos dagiti dua iti kinakapitan ngem nangabak ni Bodaño iti toss coin. Nagprotesta ni Manzano ngem pinaboran ti korte ni Bodaño.#

Comments are closed.