Footer

Libre a panagpaagas dagiti marigrigat, impakaammo ni Dip. Eric Singson

CANDON CITY – Libre ti panagpaagas dagiti marigrigat nangruna dagiti agnaed iti maikadua a distrito ti Ilocos Sur nga addaan iti Philhealth Card iti Candon City Hospital ditoy.

Impakaammo ni Deputy Speaker Eric Singson daytoy iti maysa a programa a naangay iti Santiago, Ilocos Sur a nakaimbitaranna a kas kangrunaan a sangaili.

Nainaguraran ti kabarbaro a rural health center ti Santiago idi Oktubre 18 a panagkasangay ni Mayor Josefino Miranda ket ni Congressman Eric Singson ti nanglukat iti nasao a pasdek.

Nasurok P3 a million ti nagasto iti pannakaipatakder ti dua kadsaaran a health center a nagtaud manipud iti pondo ni Singson.

Kagiddan ia nabendisionan iti dayta nga aldaw ti kabarbaro nga ambulansia a napataud  iti pondo ti ili.

Kinuna ni Singson a maipaay ti libre a panagpaagas dagiti marigrigat iti Candon City Hospital kas tulong kadakuada  nga agprobproblema iti salun-atda ken mabutengda nga agpaagas agsipud ta awan ti kuartada.

Kinuna ni Singson adda  pondo nga inlatangna iti Candon City Hospital tapno masarapana ti gastosen dagiti indigent wenno marigrigat iti ospital.

Pakairamanan kadagiti sakupen ti pondo ti hospitalization assistance kas iti bayad iti agas.

“Malaksid iti dayta, adda  pondo nga impanko idiay Philippine Heart Center, Lung Center ken Philippine General Hospital tapno  matulongantayo dagiti kakailian a mapan agpaagas sadiay,”  kinuna ni Singson.

Mainaig iti daytoy a banag, kinunana a maiwarasto ti PhilHealth ID kadagiti indigent ti barbarangay iti ilin-ili.

“Ngem dikayo agsaksakit, ta narigat ti agsakit,” inyangaw ti kongressman.#

Comments are closed.