Footer

OPINION: Grasia manipud iti turismo, masapul nga umilgat ti Amianan

Maysa a multi-billion dollar industry ti turismo. Nasken ngarud nga umilgat, saan laeng koma a sangkailgat no di ket dakkel nga apag, ti Amianan ta di met agpaudi dagiti probinsiatayo kadagiti beauty spots nga araken dagiti turista. Nasken ti pannakaala iti dakkel nga apag manipud kadagitoy a turista para iti bukod a panagdur-as ti Amianan.

Ngem sakbay a makailgat iti dakkel,  nasken ti pannakaited iti naan-anay a pokus no kasano a padur-asen ti turismo ti Amianan, no kasano a baw-ingen ti tengnged dagiti sumangpet a turista tapno umayda met ditoy Amianan a saan laeng nga idiay Abagatan a mapaliiw a kangrunaan a turongenda. Daytoy ti nakadakdakkel a ‘karit’ kadagiti tourism managers ken parliamentarian iti Amianan.

Nakapokus ti turismo iti Pinas iti agdama iti pannakaangay ti 6th UN International Tourism Forum for Parliamentarians and Local Authorities itay Oktubre 22-25 sadiay Cebu. Agdagup iti 157 a nasion ti nagatendar kadaytoy a forum  nga inorganisa ti United Nations World Tourism Organization (UNWTO) a nakapokus kadagiti kangrunaan nga isyo iti turismo: climate change, peace building, sustainable development, poverty alleviation, role of women in tourism ken dadduma pay. Nainlubongan a forum daytoy a  dinar-ayan dagiti agkakangato nga opisial ken eksperto iti turismo iti sangalubongan.

Dakkel la ketdi manen a grasia ti itdenna iti pagilian, kangrunaan iti Abagatan a nakaangayan ti forum.

Karbengan met ti Amianan ti agsagrap iti kapada a grasia a kas iti Abagatan. Ngem no saan nga agkuti, no matmaturog laeng iti pansitan, mangan no awan ti mabagina uray ittip iti  kaldero.   

Ngem kasano, ania ti aramiden ti Amianan tapno maalana met ti karbenganna nga apag? Dayta ti dakkel a karit.

Sakbay ti 2010, nakaprograman ti Japan ti 20 million nga outbound travelers. Agedad dagitoy a travelers iti 50-60 group ken maaw-awagan iti “the highest spenders.”  Programa daytoy ti Japan a “Visit the World” campaign ken naipresentar iti Japan Association of Travel Agents (JATA) World Tourism Congress sadiay Tokyo idi Setiembre 18.

Saan laeng a dagiti nataengan no di pay ti grupo  dagiti ubbing nga agedad iti 20-30 ti maaw-awis iti inda panagkallaysa iti ballasiw-taaw.  Kangrunaan iti amin, ti Pinas ti kaay-ayo a turongen dagiti Hapon.

Itoy a kaso, nasken nga agriingen ti Amianan no nakaturog pay. Nasken nga agmurmurayen no agtutuglep. Nasken nga agtignay sakbay a bukodan ti Abagatan, partikular ti Cebu, Aklan, Palawan ken Bohol ti amin nga apag dagitoy nga outbound travelers.

Saan laeng a dagiti Hapon ti manamnama a sumangpet. Pinapigsa pay ti DOT ti kampaniana iti panagawis kadagiti dadduma  pay a pagilian a kas iti Vietnam (study program), ti Russia ken dadduma pay a pagilian.

Ngem kasapulan ti Amianan ti panagtignay. Kasapulan a mapabileg dagiti amin a probinsia ti Amianan babaen ti panagkaykaysada a mangpadur-as iti turismo iti lugarda tapno makagerretda iti apagda kadagiti agsangpet a turista. Ania ti serbi dagiti nagkaadu a heritage sites, agkakapintas a playa, dagiti naisangsangayan a buya iti kapanagan ken kabambantayan a buyogan ti naidumduma a kultura ken ugali ni Ilokano no saan a maapresiar dagiti agsangpet a turista wenno maguyugoy a dumap-aw iti Amianan uray kagudua laeng ti bilang dagitoy a turista?#

Comments are closed.