Footer

Vigan City, grand slam kas Most Child-friendly City in Region

VIGAN CITY – Grand slam daytoy a siudad kas “most child-friendly city in region I”.

Iti Children’s Report ni Mayor Eva Marie S. Medina kas paset iti panangselebrar ti siudad iti Children’s Month, impakaammona a kas pammigbig iti exemplary a nagapuanan ti gobierno nga idadauluanna iti implementasion kadagiti nadumaduma a programa a mangitandudo kadagiti ubbing ditoy, inyalat manen daytoy a siudad iti maikatlo a gundaway ti “2008 Most Child-friendly City in Region I”.

Iti daytoy nga aldaw, iniggaman dagiti napili nga ubbing ti rienda ti turay ditoy babaen ti panangidaulo da Child City Mayor Jaycelle Rafanan ken ni Child City Vice Mayor Karl Thomas Ranches.

Nagpaay met a child city councilors da Samantha Gloria Singson, Vernon Gerald Pomares, Carmela Claire Salvatera, Lady Jane Katherine Ablog, Clariza Joy del Castillo, Michelle Alfiller, Joanna Irene Bilan, Marielle Ann Versoza, Wilzel Adriatico, Ivy Mae Alcain, Angeline Joy Ramirez, ken Edward Presto, idinto a Child ABC president ni Angeline Joy Ramirez, ken Child Sk Federated chairman ni  Edward Presto.

Kinuna ni Medina nga inyalat manen ti siudad ti Vigan ti pammadayaw  gapu kadagiti nadumaduma a programana para iti pagsayaatan dagiti ubbing kas iti pannakaipasdek ti Stimulation and Therapeutic Activity Center (STAC), ti "Buridek" children’s museum, ti management information system, ti tri-media campaign on children’s concerns a naisayangkat babaen ti pannakikammayyet ti Philippine National Police (PNP), K2 Program ( linis kuko, alis kuto), ken ti pannakapapigsa dagiti day care centers iti siudad.

Nagyaman ni Media kadagiti amin a miembro ti konseho ti siudad, dagiti barangay officials, dagiti pangulo dagiti nadumaduma a departamento ti gobierno ti siudad, dagiti day care ken barangay health workers, dagiti law enforcement agencies ken ti media gapu iti all-out a suportada kadagiti programa para kadagiti ubbing.

Kabayatanna, 25 nga ubbing nga agad-adal iti pagadalan elementaria ken 3 nga agbasbasa iti pagadalan a pribado iti Vigan ti napadayawan a kas 2008 Vigan City Bright Child Achievers.

Immawat dagiti napadayawan nga ubbing iti sag-P2,000 ken medalia.

Nainaguraran pay ti Vigan Youth Code ken naipresentar ti Vigan Service Guide Book, 2nd Edition sa naiyawat ken ni ABC Federated President John Patrict Singson.#

Comments are closed.