Footer

2 babai nga agdudukot, natiliw

VIGAN CITY – Gapu iti kinasiput ti maysa a guardia, naapput ti dua a babai nga agdudukot kalpasan a nakabiktimada iti maysa a sangaili iti maysa a pagtagilakuan ditoy.

Nakabalud iti agdama iti BJMP ditoy siudad da Twinkle Sinco Talania, 29, naasawaan ken Ema Talania, 47, balo, agpada a taga-Pug-os, Sinait, Ilocos Sur idinto a maisagsagana ti kaso maikontra kadakuada.

Sakbayna, nagpulong ni Estrelita Hernaez, 33, balasang, residente iti Sta. Lucia, Ilocos Sur a nadukot ti bagna a naglaon iti kuarta, ID ken driver’s licensena bayat ti panagpasiarda a sangapamilia iti Plaza Maestro ditoy siudad.

Segun ken ni Hernaez, naiwa ti bagna ket nadukot ti P7,500, nadumaduma nga ATM cards ken ti lisensiana nga agmaneho.

Addan iti dalan da Hernaez nga aggawid idi makaawatda iti text manipud iti guardia ti nasao a pagtagilakuan nga adda natiliwda a dua a babai nga agdudukot.

Nagsubli ti biktima ket positibo a binigbigna dagiti dua a babbai nga immasideg kenkuana bayat ti kaaddada a sangapamilia iti Plaza Maestro.

Segun iti guardia, nasiputanna ni Sinco a nangikkat iti maysa a retrato a naipigket iti pagtagilakuan a puon ti nangtiliwanna kadakuada.

Adun dagiti insidente ti panagdukot kadagiti pagtagilakuan ditoy siudad ket masansan a taga-Pug-os dagiti matiltiliw a nagisayangkat.

Kas pangballaag kadagiti kustomerna, adda a nakapaskil iti Plaza Maestro dagiti ladawan dagiti suspetsa nga agdudukot. (Nemia Icari)

 

Comments are closed.