Footer

Color coding dagiti bangka, mayimplementar iti Vigan

VIGAN CITY –Maiyemplementar iti kabiitan a tiempo ti color coding dagiti bangka ditoy, daytoy ti impakaammo ni City Councilor Andres Adriatico, chairman ti committee on agriculture.

Kinuna ni Adriatico a  yellow ken blue ti naituding a kolor dagiti bangka iti Vigan City.

Impakaammo pay ti konsehal nga adda bayadan dagiti mangngalap a P600 a registration fee para iti tallo a tawen ken sakbay ti panagrehistro, masapul a tunggal mangngalap ket addaan iti life jacket.

Mamulta dagiti aglabsing iti daytoy a pagannurotan iti P2,500 iti umuna nga opensa, P5,000 iti maikadua ken pannakaibalud iti makabulan  iti 3rd offense.

Insingasing ni Adriatico a bayadan ti city government ti P600 para iti pannakairehistro dagiti bangka dagiti mangngalap ditoy siudad.

Agdagup iti 18 dagiti coastal towns iti probinsia.

Mayimplementar ti color coding dagiti bangka iti probinsia tapno malapdan dagiti illegal a panagkalap.

Babaen iti kolor dagiti bangka, maitudo dagiti autoridad no ania nga ili ti naggapuan dagiti bangka, nangruna dagiti agisayangkat iti panagbongbong wenno panagdinamita. (Nemia Icari)

Comments are closed.