Footer

EDITORIAL: Doble siput koma ti BFAD

Saan laeng koma a dagiti taraon a produkto ti China ti ipasidong ti Bureau of Food and Drugs (BFAD) iti product safety testing no di pay dagiti locally manufactured food products amangan ketdi no naggapu iti China ti gatas a  ramen dagitoy a produkto.

Doble-siput koma ti BFAD. Nakakonsentret la ngamin ti ahensia kadagiti produkto a nagtaud iti China ket dina inamiris dagiti partuat ditoy pagilian.  Kasla panagsagad iti paraangan ti sabali ngem di met masagadan ti bukod nga inaladan.

Kas itay lawasna, natakuatan ti Hong Kong ti kinaadda ti melamine iti Blue Berry Cream Sandwich a produkto ditoy  Pilipinas babaen ti Croley Foods Sunflower Crackers. Inikkaten ti Centre for Food Safety ti nasao a biskuit iti merkado.

Itoy a duktal, agparparang a maymaysa laeng ti turong ti imatang ti BFAD, dagiti laeng produkto ti China ti am-amirisenna. Nasken nga amirisenna  met dagiti sabali a produkto nga aramid ditoy amangan no saan laeng a ti aramid ti Sunflower ti addaan iti melamine no di pay dagiti dadduma a locally made products.   

Ti pannakatakuat iti kinaadda ti melamine iti produkto ti Pinas  ti mangipaneknek iti nainget a panagsiput dagiti amin a nasion a pageksportan kadagiti produkto a taraon. No dumakkel daytoy nga apuy ti takuat, uramenna  metten ti sibubukel a negosio ti eskportasion kadagiti taraon. Saan laeng a dagiti agpupuonan ditoy pagilian ti agsagrap iti nakadakdakkel a pukaw no di pay ti gobierno.

Saan a nakakaskasdaaw iti kinaadda ti melamine iti produkto a nagtaud iti Pinas. Ngamin iti laengen bulan ti Enero agingga ti Agosto, nakaipatuloden ti China iti Pinas iti 2,138,397 kilogramo a gatas. Posible a naaramat daytoy a gatas kadagiti paktoria iti panagaramidda kadagiti produktoda. 

Tapno saan a mapataud ti panagamak dagiti consumers  iti sangalubongan a gumatang kadagiti produkto ti Pinas, nasken a maiwayat ti nainget a laboratory test kadagitoy.

Saan a problema ti  kinabassit ti tao ti BFAD a mangipatungpal kadagiti lab test. Nagadu dagiti laboratorio kadagiti unibersidad a yan dagiti  eksperto iti panagamiris. Apay a saan a dagitoy ti ikonsidera ti BFAD a kas katulonganna wenno i-deputized a kas ahensia nga agamiris?

Iti pannakaaprobar ti Senate Bill No. 2645, limmawa ti regulatory capacity ti ahensia, ket nagbalinen a Food, Drugs, Cosmetics and Devices Administration (FDCDA). Naaddaanen iti ngipen a mangipatungpal iti asalto nga inspeksion kadagiti paktoria no agtungtungpalda met laeng kadagiti pagannurotan ken paglintegan. Kangrunaanna, addaanen iti ngipen a mangpaserra ti aniaman a kompania wenno negosio a matakuatan nga aglabsing, partikular iti panagaramat iti gatas a nalaokan iti melamine ken dadduma pay a banned a ramen, saan laeng nga iti taraon no di pay iti kosmetiko, agas ken mainum.

Agsakbay maarus pay, kunada. Isu a maigunamgunam ti doble a panagsiput ti nasao nga ahensia. (jagpalo)

 

Comments are closed.