Footer

Impataw ti Task Force Bimmotobot: 90-aldaw a suspension ti dati a hepe ti polis ti Dagupan, lima pay

SAN FERNANDO CITY – Tallo a bulan ti naipakat a preventive suspension ti dati a hepe ti polis ti Dagupan City ken lima pay a tattao gapu iti mapapati a pannakainaigda iti natakuatan a laboratorio ti droga iti Naguilian, La Union.

Segun ken ni Deputy Regional Director for Administration Ramon Gatan, pangulo ti Task Force Bimmotobot a natudingan nga agpalutpot iti nadiskubre a shabu lab iti Bimmotobot, Naguilian, La Union, nagepekto ti suspension maikontra ken ni dati a hepe ti polis ti Dagupan City Dionicio Borromeo ken lima pay a polis itay Oktubre 27 agingga iti Enero 24, 2009.

Kadua ni Borromeo a nasuspende iti 90 nga aldaw da Chief Inspector Gil Gempes, SPO4 Ambrosio Sayson, PO3 Joey Abang, PO2 Walter Banan ken PO1 Rodolfo Damian.

Malaksid nga addada iti floating status, awan ti sueldo dagiti nasuspende iti tallo a bulan ken awan ti 13th month pay ken bonusda iti Paskua.

Kinuna ni Gatan a naipakat ti suspension kadagiti innem a polis tapno malapdan ti panangimpluensiada kadagiti saksi bayat ti pannakapalutpot ken pannakadengngeg ti nasao a kaso.

Agdagup iti 54 dagiti polis a naka-assigned iti Police Regional Office 1 ti narelibo iti puestoda wenno iti nakaikappenganda a unit gapu iti mapapati a pannakainaigda iti shabu lab.

Nupay inrekomenda ti task force ti panagsublin ti 44 a polis iti mother unitda, awan pay ti aksion manipud iti Camp Crame.

Maipalagip nga idi Hulio 9, rinaut dagiti nagtitipon a puersa ti polis ti maysa a laboratorio iti Bimmotobot, Naguilian, La Union ket kinumpiskada dagiti nadumaduma a ramit ken kemikal a maar-aramat iti panagpartuat iti shabu.

Naikalam-it ti nagan ni Borromeo kalpasan nga innaganan ni Dante Palaganas, ti natiliw a caretaker, nga adda mapapati a pannakainaigna iti nasao a shabu lab.

Ni Borromeo ti pangulo ti Regional Mobile Group 1 (RMG1) dii maraut ti nasao a laboratorio.

Adda iti babaenna dagiti polis a kaduana a nasuspende.

Kinuna ti polis a makapartuat dagiti nasamsamda iti laboratorio a ramramit ken kemikal iti agpateg iti maysa a trillion a shabu.#

 

Comments are closed.