Footer

No awan latta pagbasuraan ti Baguio, makasuan dagiti opisial ti siudad: EMB

BAGUIO CITY – Imballaag ti Environmental Management Bureau (EMB) iti  Cordillera posible a pannaikaso dagiti opisial daytoy a siudad  no awan latta ti maipasdek a permanente a pagibasuraan ditoy.

Problema ti gobierno ti siudad ti pagibasuraanna iti sanguanan ti panagprotesta dagiti agnaed iti dati a pagibasuraanna iti Irisan gapu iti kunada a peggad nga itdenna iti salun-atda a lumugar.

Sumagmamano a lugar ti naisingasing a pagibasuraan ti siudad ngem saan nga agtutunos dagiti opisial ti siudad no ania a lugar ti agbalin a sanitary landfill ti siudad.

Kabayatanna, intanggaya ti Benguet Corp. (BC) ti pannakaaramat ti  Antamok "open pit" mining area a pagibasuraan ti siudad.

Segun iti BC, mabalin nga aramaten ti siudad ti  Antamok "open pit" area nga awan ti gastuen ti siudad no la ketdi maisubli iti kompania kalpasan ti 30 a tawen ken sumrek iti kaha ti munisipio ti Itogon ti mapastrek iti operasion ti sanitary landfill gapu ta daytoy ti host iti “open pit” a lugar.

Kinuna ni Mayor Reinaldo Bautista Jr.  a babaen ti offer ti  BC, marisut met laengen ti problema ti panagibasura iti siudad.

Ngem nupay umanamong ti siudad a maited iti Itogon ti mapastrek iti operasion ti pagbasuraan ken pabor ti rekomendasion ti maysa a panagadal ti World Bank, malaksid ti pannakagun-odna dagiti pagbatayan nga impataw ti Department of Environment and Natural Resources, kasapulan pay a maala ti siudad ti pammalubos dagiti maapektaran a komunidad sakbay ti pannakaipasdek ti pasilidad ti pagbasuraan.

Imbataden dagiti residente iti Barangay Virac, Itogon ken Nangalisan iti Tuba ti panangkontrada iti pannakaipasdek iti sanitary landfill iti lugarda agsipud iti itdenna a pagpeggadan iti salun-atda ken iti aglawlaw.

Kinuna ti EMB iti Cordillera a mapilitan a mangirekomenda iti  National Solid Waste Commission (NSWC) ti pannakaipila iti darum kadagiti opisial ti siudad no saanda a makaipasdek iti pagibasuran ti siudad tapno masolbar ti dumakdakes a problema iti panagibasura ditoy.#

 

Comments are closed.