Footer

SALAYSAY: ITI INDAYON NI LAGIP: Sika a Karissabong ti Tapaoan (Maudi a paset)

Nagteksak kenka ket imbagak nga addakamin iti barangay Castro.  Kinunam iti teksmo a saan a makauli ti luganmi  ta nasang-at ti dalan.  Imbagam nga aguraykami.  Iti saan a mabayag, dimtengkayo nga umay mangsukon kadakami.

Nakikalugan da Jhonny ken Jun iti maysa a motor ket duata a nagkasakay iti maysa pay a motor. Siak ti imbagam nga agmaneho. Immannugotak.

Idi sumang-at ti naglugananta, nariknak ti dua a singin a turod a naipideg iti bukotko. Tinaliawka ket anian a nagsam-it ti isemmo.  Nagkulibagtong ti pusok.

Iti isasang-attayo, nakitak ti napanayag a buya iti aglawlaw.  Ti sementado a kalsada a naibarikes iti bakrang ti bantay a pakatannawagan dagiti nauneg a rangkis. Iti laud, nagdeppa ti nalawa a baybay Tsina.  Iti agsumbangir a sikigan,  nakatingtingra ti berde dagiti kaykayo a kimmepkep iti sellang ti bantay.  Napresko  ti ti pul-oy ti angin a mangay-ay-ayam iti rupata iti panagdaliasatta. Wen, kas kapintasmo ti lugaryo, Lorena.

Naragsak daydi kasangaymo, Lorena.  Adu ti sangailim a  babbaro ken babbalasang. Talaga a nagsaganaka.

Diak malipatan ti panangikalikagummo a dumaniwak.   Nupay diak nakasagana,    inkarigatak ti nagdaniw uray saan unay a naurnos dagiti inyebkasko a balikas.  Kiniddaw met dagiti sangailim ti panagdaniwmo. Idi malpaska a nagdaniw, nagdir-ida pay  ket maysanmaysa ti nangkablaaw kenka. Naanninawak ti napalalo a ragsakmo kadagiti matam ken kadagiti nasam-it nga isemmo.

Ngem dayta metten nga aldaw ti maudi a panagkitata, Lorena.

Nadamagko laengen a napanka idiay Isabela tapno ituloymo ti panagadalmo sadiay. 

Dakkel ti pannakaikawak iti panaginnadayota. Naglumen ti namaris nga aglawlawko.  Napukaw ti ngayed ti lubongko.  Binirbirokko ti nasam-it nga isemmo kadagiti rinibu a bituen iti tangatang aglalo no kasdiay a kasellag ti bulan.  Sinapsapulko ti nalibnos a rupam kadagiti nagukrad a sabong iti minuyongan a mamagungar koma toy dandani maitanem a kararuak.

Idi damo, agsasaruno dagiti teksmo kaniak. Dagita ti nagbalin a liwliwak no kasdiay a seknannak iti iliw kenka, Lorena.

Ngem iti panaglabas dagiti bulan, kimmisang dagiti sumangpet kaniak a teksmo. Agingga a naminpinsan nga awanen ti nadamagko pay kenka. 

Ita, pamrayak laengen ti agsennaay iti panagmaymaysak, Lorena.  Nalipatannak, kadin?  Ammok nga iti dayta a kinalibnosmo, adu dagiti kulibangbang nga agam-ampayag iti aglawlawmo.

Addanto pay ngata gundaway nga agkitata manen?  Unayen aya, Lorena, ta nasapaak a nayanak.  Unayen ta nagkitata iti panawen a sabali ti pagpuspusiposanta a lubong.

Nupay kasta, agnanayonkanto latta ditoy pusok iti baet nga agpatinggaak laeng iti arapaap.  Kayarigam tay maysa a bituen a rumimatrimat iti law-ang a tangtangadek iti sardam, ingget ngato, saanko a pulos magaw-at.

Ditoyen ti pangipatinggaak daytoy suratko, Manong Danny.   Naimbag nga orasmo, Dios ti agbati kenka.

Toy Pagayammo

                        Oming

          Santa Cruz, Ilocos Sur

 

Comments are closed.