Footer

Salaysay: Lawag iti nasipnget a dalan (Umuna a Paset)

Naimbag nga aldawmo a sangbayan daytoy nanumo a suratko ket sapay koma ta addaka iti nasayaat a karadkad tapno agtultuloy daytoy nalatak a benneg nga imatonam.

Saan a naidumduma daytoy a pakasaritaan ti biagko ngem ketdi, gapu iti maysa a pagteng, ad-adda a naamirisko ti kinapateg ti ay-ayatek la unay nga asawak. 

Kastoy ti rugina, Manong Danny. Iti maysa nga aldaw iti Mierkoles, kagapgapuk iti Candon a gimmatangak kadagiti kasapulanmi iti balay.

Kaidisdissok dagiti ginatangko idi makatimudak iti timek manipud iti paraangan.  Ubing a lalaki ti umaw-awag.

“Nia kadi ti masapulmo, barok?”  dinamagko.

“Kua, angkel, umaymo kano iyawid ni ma’am. Agsakit kano manen ti pangana.”

Simro man ngatan ti ag-agalenna, dagus a simmiplot iti panunotko. Mangisursuro ni baket iti central school iti ilimi.

Kalpasan  a naiserrak ti ridaw, arintarayennak a  nagturong iti eskuela.   Nasangpetak ni baket nga agdumdumog iti lamisaanna.  Agsangsangit.

“Apayya, baket?” dinamagko.

“Simro manen ti saksakitek,” nakunana.

Inyawidko ni misisko ket impaiddak iti katre.

“Mapanka idiay balay ta kasaritata ni tatang, ta no ania ti makunana, mapantayo manen agpakita idiay Baguio,” kinuna ni baket.

Sinukonko ni Tatang. Nagsaritada ken ni baket.  Inkeddengda a mapankami iti Baguio.

Kabigatanna, adda pay la riwriwetna, nagbiahekamin.

Alas siete iti bigat idi simmangpetkami idiay Baguio General Hospital.  Sigida nga inamiris dagiti doktor ni baket.  Adda kano urat  a bimmalangan iti pispisna isu nga agsakit no mangan. Masapul kano nga aggian iti ospital tapno maagasan.

Manong Danny, aganay a tallo a lawas a naggigian ni baket iti ospital.

Maysa nga aldaw, iti oras a panagbisita ti doktor kadagiti pasienteda, naikiddaw a rummuarkami nga agbanbantay.

Rimmuarak ket nagtugawak sako insanggir ti bagik iti dakkel a puon ti kayo a saleng.  Namrayak a binuybuya dagiti agiinnabrasa a sanga a sutsutilen ti puyupoy. Nasalemsem ti aglawlaw.

Kaipitpitikko ti rungrong ti sigariliok idi adda immasideg kaniak. Agtawen ngata iti disiotso. Naka-sunglass. Adda pamuyaanna. Naisem ken simmantamaria ti rupana.  Pagatsiket ti buokna.

“Mabayag kadi sadatayo  pastreken, manong?”  dinamagna. Anian a naglamuyot ti timekna, Manong Danny.

“Siguro, malemto ngatan,” insungbatko. “Taga-anokayo kadi, ading?” 

“San Fernandoak, manong. Bambantayak ni nanangko.  Ket dakayo ngay, manong, ania kadi met ti iliyo?”

Imbagak ti ilik.

“Ania met ngay ti madaydayaw a naganmo?”

“Awagannak laengen iti Lyn, manong, ngem Linda ti birngasko.”

Naragsak a katungtong ni Lyn, Manong Danny.  No umisem, agminar ti kallid iti agsumbangir a pingpingna.  Kasla naundayen a panawen ti panagkitkitami.

Naammuak a limada nga agkakabsat. Agtawen laeng ni Lyn iti lima idi matay daydi amada. Ngem iti baet ti kasapana a nabalo, inkarigatan ti inada nga insakad ti biag ken panagadalda.

“Kaasi ti Dios, napagadalnakami amin ni nanang, manong,” nakuna ni Lyn. “Dakkel ti sakripisiona gapu kadakami. Pagyamananmi ta dina pinanunot ti bukodna a ragsak nupay ubing pay a nabalo.”

                                       (Maigibusto)

Comments are closed.