Footer

BANNER NEWS: Gapu iti idadakkel ti populasion, produksion ti bagas, agkurkurang: DA

CANDON CITY – Inannugot ti departamento ti agrikultura nga agkurkurang ti produksion ti bagas iti sanguanan ti dumakdakkel a populasion ti pagilian.

Kinuna ni DA National GMA Rice Program Director Frisco Malabanan nga umab-aboten ti populasion iti nasurok 80 million ket daytoy ti  makaigapu no apay nga adda 10% a pagkurangan ti  rice production iti pagilian.

Kinunana nga idi 2007,  aganay a 16.24 metriko tonelada ti naapit kadagiti irrigated a kataltalonan idinto a 12.27 a metriko tonelada laeng iti rain fed isu a nakatutok ita ni Presidente Gloria Macapagal Arroyo iti pannakarehabilitar dagiti irrigation system iti pagilian.

Kinuna ni Malabanan a no mapapintas ti irrigation systems, umadu ti produksion ket maikaadu pay ti agdama a 4.21 metric tons/ hectare yield iti irrigated lands ken 2.9 metric tons  yield iti rain fed.

Aganay P140 million ti pategna a proyekto ken ramit iti talon ti impaay ti DA kadagiti agduduma nga ili ti probinsia bayat ti Fertilizer, Irrigation Extention, Education and Training, Loans, Dryers and other Post Harvest Facilities and Seeds (FIELDS) program information caravan a naangay ditoy a siudad itay Oktubre 29.

Karaman kadagiti naiyawat ti leaf color charts, irrigation certificates para iti rehabilitasion dagiti national ken communal irrigations iti agduduma nga ili, water pumps, farm to market road certificates nga umabot iti P81 million, light traps, flat bed dryers, hybrid seeds ti mais ken pagay, soil inoculants, biologics ken ag-agas para iti dinguen, tseke para iti panagpautang dagiti kooperatiba kadagiti mannalon ken certificates para iti training ken e-learning.

Kinuna ni Gob. Deogracias Victor “DV” Savellano a dakkel a banag ti FIELDS program a makatulong iti problema ti nangina a ganagan, pannakasimpa dagiti nabagyo a padanum ken pautang a nababa ti interesna para kadagiti mannalon.

Kabayatanna, dinawat ni Cong. Eric Singson iti DA nga imdenganda koma dagiti problema ken arungaing dagiti mannalon kangrunaan ti pannakailaka ti presio ti ganagan kalpasan a nagsueken ti presio ti produkto petrolio.

Kinaritna pay ti ahensia a no mangtedda iti P240 million iti Ilocos Sur, mangted met ti opisinana ken ti opisina ni Gob. Dv Savellano iti P250 million a counterpartda nga aggapu iti bingayda iti R.A. 7171.

Kinuna ni Malabanan nga aganay a P13 billion ti pategna a proyekto iti irrigasion ti naisubmitaren iti presidente ket indagadagna kadagiti taga- Ilocos Sur a mangipasada kadagiti resolusion iti provincial ken regional offices ti National Irrigation Administration tapno mairaman a mapunduan dagiti proyektoda.

Innayonna nga adda P3.24 billion  a mabalin a maipautang kadagiti farmer’s cooperatives ken farmer’s association  nga awan ti kasapulan a collateral ken babaen ti 8.5% nga interes tunggal tawen.

Manamnama a 45,765  a mannalon ti mabenepisiaran iti daytoy a pautang.#

Comments are closed.