Footer

EDITORIAL: Ti panagbalbaliw nga ur-urayenmi

Iti panangabak ni Barack Obama a presidente, ur-urayenmi ti angot wenno puyupoy ti kunkunana a panagbalbaliw idi madama ti kampania. Daydiay siguada ti kinatalingengen. Daydiay medida ti dur-as ken nasalun-at a puyupoy ti ekonomia.

Makunami a saan a kas iti kalawa ti isem ni Obama iti  panangabakna a kas kaunaan a black president ti kalawa iti siled a pagkutianna agsipud iti posibilidad ti ibabaddekna iti buttaw a sapatos ni Pres. Bush. Saan a makapnek dagiti polisiana maipapan iti internal a panangiwardas ken ti foreign relasion.

Makauman a dana ti panagbalbaliw iti mata dagiti umili . Ket gapu ta maysa nga ex-military man ti nakalaban ni Obama, adda ngarud kenkuana ti simpatia dagiti umili agsipud ta masirmatada kenkuana ti posible a pakabirokan iti ing-ingpen a panagbalbaliw no di man panagturong iti mas praktikal a wagas iti panangitag-ay iti ekonomia. Kunami a daytoy ti kadakkelan a nangpangabak kenkuana.

Nakautangen ti US iti $10 trillion. Tinawid ni Bush daytoy kadagiti sinarunona. Karaman ti polisia nga umutang sa mapan makigubat. Dakkel ti naggastosan ti US iti nakaat-atiddog a gubat iti Afghanistan  ken iti Iraq, Ti panangnayonna kadagiti tropa iti Afghanistan, ken ti pull-out iti Iraq iti uneg ti 16 a bulan sana imbabawi.

 Kunaenmi a dayta atiddog a gubat iti Afghanistan ken iti Iraq ti mitsa iti itatayok ti ti presio ti langis a puon ti nakadaleban ken nagareng-engen dagiti babassit a nasion a nakadepende itoy.

Karaman ti Pinas a naiguyod a naipababa idinto a nagaringgen dagiti dadduma a pagilian iti posible a pannakaapektoda iti pannakadaleb ti ekonomia ti USA.  

Ur-urayenmi ngarud ti puyupoy iti ibagbaga ni Obama a panagbalbaliw, daydiay  nakaangkla iti kappia a saan ket nga iti nabang-i nga angot ti pulbora. Daydiay lumaksid ken sumawang iti alad a taltaluntonen ti pagilianna ta posible a daytoy ti tuladen dagiti mangsipsiput kenkuana a babassit a nasion.

Daytoy a tugot ti US ket makita iti desdes ni Pinas – umutang wenno mapautangan, ikadakkel ti buis santo mapasamak ti gubat sadiay Mindanao. Saan a makaitag-ay iti ekonomia ti kastoy nga addang ti kinaambagel.

 Simple laeng ti puyupoy ti panagbalbaliw nga inkam ing-ingpen:  ti pananggamulona iti krisis nga agbalin a kas dakkel nga oportunidad, a kas iti bileg ti timmekken iti nakangatngato ken nakaad-adayo. Daytay big leap a kunada tapno makabawi a dagus ti pagilianna a  tuladen dagiti nasion a naidagem ken agtungtunglab. Dagiti polisia ken political will dagiti nagpresidente a nangpabalin ti dapo ti pagilianda a kas pedestal, a kas kada Franklin D. Roosevelt ti US, Mustafa Kemal Ataturk ti Turkey, Lee Kuan Yew ti Singapore ken Deng Hsiao Ping ti China.

Ur-urayenmi dayta puyupoy ti kabarbaro a panagbalbaliw nga inkari ni Obama. Panagbalbaliw a ridaw ti kabarbaro a lubong. No makautoy ti panaguray, wenno iti kadadaksan, ti panaguray iti di met sumangpet, mamantsaan ti historia politikal iti pannakapaay.#

Comments are closed.