Footer

Scholarship fare, inrussuat ni Dip. Eric

CANDON CITY -Tapno agtultuloy a matulongan dagiti agtutubo, nangruna dagiti marigrigat a di makasapar nga agbasa iti kolehio, impalgak ni Deputy Speaker Eric Singson a mangirussuat ti scholarship fare para kadakuada.

Kinuna ni Singson a saklawen daytoy a programana dagiti awan pagbasana iti kolehio ken di pay nakastrek iti aniaman nga scholarship grant ken isu ti mangpili iti kurso nga adalen dagiti mapili.

Kinuna ti diputado a nagkonsulta iti Departamento ti Edukasion mainaig dagiti kurso nga in-demand ken nalaka a pakastrekan dagiti agturpos iti panggedan, nangruna iti sabali a pagilian ket uppat a kurso a pakaibilangan ti culinary arts, architecture, civil engineering ken nursing ti napilina nga idiaya kadagiti agaplay a kas iskolar iti babaen daytoy a programa.

“Dagitoy a kurso ket nalaka nga ibirokan iti trabaho, saankayon a marigatan nga agsapul ta in-demand dagitoy,” kinunana idinto nga impalgakna nga adu nga slots ti agur-uray kadagiti aplikante nangruna dagiti agindeg iti maikadua a distrito iti Ilocos Sur.

Makunkuna nga ama iti scholarship program ni Singson maigapu iti agtultuloy a programana iti panagbasa dagiti agtutubo.  Itay laeng Oktubre 27, inyawatna ti tseke kadagiti 500 nga scholars ti National Commission on Indigenous Peoples (NCIP) a pinunduanna. 

Kabayatanna, kinuna ni Engr. Sacho Buquing,  kabarbaro a regional director ti NCIP, a madoble ti bilang dagiti iskolar ditoy iti sumaruno a tawen gapu ta dinoble ti kongessman ti pondona.

Itay Oktubre 29, agarup 800 nga scholars ti Cong. Eric Singson Scholarship Grant (CESSG) ti immawat met iti tseke a paag-enrolda iti maikadua a sementre.#

Comments are closed.