Footer

4th Nakem Conference, maangay

Angayen ti Ilokano Language and Literature Program iti Unibersidad ti Hawai’i iti Manoa ti maika-4 a Nakem International Conference a “Dap-ayan: Sharing and Understanding Ethnolinguistic Worlds Towards Cultural Pluralism” inton Nobiembre 11-14, 2009 iti UH Manoa.

Manamnama nga atenderan daytoy nga uppat nga aldaw a komperensia dagiti cultural researcher, dagiti edukador ti tawid a lengguahe, dagiti mangitantandudo iti pannakapadur-as ti kannawidan ken kultura, dagiti lider iti pannakabalabala dagiti polisia a para iti sapasap, dagiti mangmangged iti kultura, ken dagiti mannurat ken artista nga interesado kadagiti isyo ti kultural a pluralismo, ti edukasion a multikultural, ti kultural a demokrasia, ti panagisuro iti tawid a lengguahe, ken dagiti kritikal a praktis a mainaig kadagiti karbengan iti lengguahe ken iti nainkagimongan a hustisia.

Panggep daytoy a komperensia,  maikapat iti serye ti Nakem Conferences a nangrugi idi 2006 iti selebrasion ti sentenario ti isasangpet dagiti Ilokano iti Hawai’i ken maikadua iti Estados Unidos,  a luktan ti kritikal ken managpartuat a diskurso – kas mapaspamasamak iti dap-ayan – maipapan iti kaes-eskan ti pannakibinnuray iti kannawidan iti multikultural a Filipinas ken kadagiti amin a tattao a Filipino iti diaspora.

Namnamaen pay ti komperensia ti pannakadiskutir ti lugar ti lengguahe nga Ilokano ken dagiti nadumaduma a lengguahe iti plural a kultural a padas dagiti makipagili iti Filipinas ken kasta met ti pannakatingiting dagiti metodo ken metodolohia a mabalin a mausar tapno masungbatan dagiti isyo maipapan iti edukasion a multikultural, literasi, kultural a produksion ken promosion, pannakasustenir kadagiti sibibiag a tradision, ken pannakaisurat ken pannakaiburay kadagiti tawid a kultural.

Tapno makonsiderar dagiti maisumite nga abstrak, masapul a maisentro dagitoy iti tema wenno ania man kadagiti sumaganad: Ilokano and heritage language teaching and the world languages curriculum; appreciating ethnolinguistic worlds; tangible heritage from the various ethnolinguistic groups; theories and practices in the sharing and understanding of a heritage;  cultural pluralism as a philosophy of education;  pathologies of multiculturalism, remedies of cultural pluralism; languages and cultures in the diaspora; subversions of the multicultural Philippines experience; ken mass media, popular culture, and heritage education.

Ni Dr. Aurelio Solver Agcaoili, coordinator ti Ilokano Language and Literature Program iti UHM, ti mangipangulo iti komperensia. Da Dr. Lilia Quindoza Santiago, assistant professor iti Ilokano, UHM ken Dr. Raymund Liongson, coordinator ti Philippine Studies Program iti Leeward Community College, ti mangasistir ken Agcaoili.

Dagiti dadduma pay a kameng ti steering committee: Clem Montero, lecturer iti Ilokano ken education specialist iti UH Center for Philippines Studies ken Julius Soria, instructor iti Ilokano iti UHM ken instructor met laeng iti Ilokano iti Farrington High School iti Kalihi, iti met laeng Honolulu.

Masapul a maipatulod ti abstrak iti saan a naladladaw ngem Enero 31, 2009 iti nakemconferen[email protected], mai-cc iti [email protected] ken [email protected]

Mapakaammuan dagiti napili sakbay wenno iti kaaldawan ti Febrero 15, 2009. Maammuan dagiti dadduma pay a pakaammo maipapan iti komperensia iti nakemconferences.blogspot.com. Mabalinyo pay ti bumisita iti website ti programa iti Ilokano Language and Literature iti UH Manoa, biroken ti Nakem Conference.#

Comments are closed.