Footer

Beauty spots, industria ti Ilocos Sur, naitandudo iti eksibit iti NPC

MANILA – Iti nasurok a makabulan, agbalin nga atraksion iti aglawlaw ti opisina ti National Press Club ditoy dagiti napipintas a lugar, industria ken dadduma pay a ladawan a mangitandudo iti Ilocos Sur.

Kinuna ni Gob. Savellano a dakkel ti maaramidan daytoy a gannuat tapno lalo pay a maitandudo ti turismo ti probinsia.

Napauluan ti eksibit iti “7 Days in Ilocos Sur”, nagbinnuligan  a rinetrato da Rivoli Cortez ken Edwin Bacasmas, dua kadagiti mabigbig a photojournalists iti pagilian, dagiti ladawan a kangrunaan a destinasion dagiti sangaili ken turista no bumisitada iti probinsia.

Pormal a naluktan ti eksibit idi Nobiembre 5 babaen kada Gov. Deogracias Victor “DV” Savellano, Dept. of Tourism Undersecretary Eduardo Jarque Jr. ken NPC Pres. Benny Antiporda ket agpaut dagiti ladawan a maipabuya iti publiko iti 45 nga aldaw.

Malaksid iti eksibit, impablaak pay da Cortez ken Bacasmas dagiti ladawan kadagiti national daily newspapers.

Karaman iti eksibit dagiti tourist spots ti Ilocos Sur a kas iti Vigan Heritage Village, St. Paul Cathedral iti Vigan City,  Sta. Maria church, San Juan de Sahagun church iti Candon City ken dadduma pay a napipintas a lugar a nagbalinen a paborito a pagpasiaran dagiti turista ken sangsangaili, kasta met dagiti parambak a naangay iti probinsia kas iti Begnas Festival iti Candon City.

Kabayatanna, angayen ti gobierno probinsial katinnulong ti Federated Philippine Photographers Association ti tallo-nga-aldaw a seminar para kadagiti photographers, information officers dagiti 34 a munisipalidad ken siudad ken amin nga agduyos nga agretrato a taga-Ilocos Sur.

Maangay daytoy inton Disiembre 13-15 iti kapitolio ti probinsia.#

Comments are closed.