Footer

Plantasion ti marihuana, rinaut dagiti polis iti 3-aldaw nga operasion

SAN FERNANDO CITY – Agdagup iti P28 milion dagiti mula a marihuana a pinag-ot ken pinuoran dagiti nagtipon a bunggoy dagiti polis iti tallo-aldaw nga operasion nga insayangkatda iti nagbeddengan ti Benguet ken iti La Union itay nabiit.

Segun ken ni Police Chief Supt. Luizo C. Ticman, PRO1 regional director, rinaut dagiti nagtitipon a bunggoy ti PDEA-RO1; PDEA-CAR; TOG-1 PAF ti Northern Luzon Command (NOLCOM); 50th IB, 503rd Brigade, Philippine Army; Regional Mobile Group 1 (RMG1); La Union Provincial Anti-Illegal Drugs Special Operations Task Group (PAIDSOTG); La Union Provincial Mobile Group (PMG) ken  MIG-1/ISAFP dagiti nadumaduma a plantasion ti marihuana iti tri-boundary ti Benguet, La Union ken Ilocos Sur ket pinag-ot ken pinuoranda ti  132,000 a fully grown a mula a marihuana, 6,350 a bunubon ken 55 kilos a napagango a bulong daytoy maiparparit a droga a mapattapatta nga agpateg amin iti P28,129,000.

Iti sitio Tebteb ken Balbalnag, Badeo, Kibungan, Benguet ken ti Barangay Sasaba, Santol, La Union a masarakan amin iti pagbeddengan ti Benguet ken La Union ti nakaimulaan dagiti maiparparit a mula.

Nupay kasta, awan ti natiliw dagiti operatiba nga agay-aywan kadagiti plantasion ta posible a naangotanda ti iraraut dagiti polis.

Sakbayna, imbilin ni Ticman ti panangberipika dagiti operatiba iti babaenna ti report a nainbolbar dagiti kameng ti New People’s Army iti agtultuloy a panagmula iti marihuana kadagiti plantasion kas pamataudanda iti pundoda a nagresulta iti pannakadiskobre dagiti sumagmamano a lugar a pakaimulmulaan dagitoy iti tri-boundary ti Ilocos Sur, La Union ken Benguet.#

Comments are closed.