Footer

SALAYSAY: Illegal recruitment: napigsa a negosio … (Umuna a paset)

Masansan ti pannakabasatayo iti diario, mangegtayo iti radio ken mabuyatayo iti telebision dagiti kakailian a biktima ti illegal recruitment wenno naabuso iti ima dagiti amoda iti ganggannaet a pagilian. Ti makapadakes unay, adun ti bilang dagiti kakailiantayo a nadamagtayo a napugotan wenno nabitay wenno naibalud iti sabali a pagilian gapu iti nagduduma a rason. Ngem kangrunaan a makaigapu ti pannakaabusoda agsipud ta saanda a naglasat iti umisu a proseso iti ipapanda iti sabali a pagilian.

Adu ngamin kadagiti kakailiantayo ti nagtured a makigasanggasat a mapan iti sabali a pagilian agsipud ta kayatda ti makalung-aw iti kuko ti kinapanglaw a mangilumlumlom kadakuada. Dagitoy a kakailiantayo, uray iti tadem, kumpetda tapno laeng sumayaat wenno rumaniag ti masakbay ti pamilia ken patpatgenda iti biag. Kadakuada, makapanda la ketdi iti sabali a pagilian, saanda nga agpangadua uray pagaammoda nga illegal ti iseserrekda iti pagilian a papananda pagtrabahuan. Kastay kunada, uray karadkadda, madadaanda a mangigasanggasat tapno laeng makapagtrabahoda iti sabali a pagilian a yan ti namnamada a “narabraber a pagaraban”.

Adu dagiti wagas wenno pamuspusan wenno panglakagan nga iwaywayat dagiti illegal a recruiter ken dadduma pay nga agipatpatulod kadagiti trabahador tapno makapagtrabaho ti aplikante iti sabali a pagilian. Maibilang dagitoy nga illegal agsipud ta saan nga aglasat dagiti mapan agtrabaho iti umisu a proseso  nga agtungpal iti pannakaidadanesna, pannakalabsing dagiti kalinteganna a kas trabahador ken ti kadaksan, ti posible a pannakatiliw ken pannakabaludna gapu ta maysa nga alien a naglabsing iti paglintegan ti simmangbayanna a pagilian.

Adtoy nga ibinsabinsami dagitoy a panglakagan, kas maibatay manipud iti Philippine Overseas Employment Administration (POEA):

Tourist-Worker Scheme. Iti daytoy nga iskema, pumanaw ti trabahador ditoy pagilian a kas turista ngem  agtrabaho iti sabali a pagilian ti pudpudno a panggepna.

Kas iti maysa a kalugaranmi a mapan agtrabaho a kas hardinero iti maysa a baknang iti maysa a pagilian iti Europa. Idi agbiahe manipud ditoy pagilian, tourist visa ti iggem ti kalugaranmi. Ngem natalged a nagbiahe ta naitawag kenkuana a sukonen ti employerna iti airport.

Ti problema, idi makadanon iti airport, nagsuspetsa dagiti taga-immigration ket sinumariada: no mano ti kuyogna a kuarta, traveller’s check, paggiananna ken dadduma pay. Idi maammuan dagiti taga-immigration a $100 laeng ti pocket moneyna, dinetenedan iti airport. Saan metten a nagpakita pay ti employerna.

Kalpasan ti dua a lawasna iti pagbaludan, inluganda iti eroplano nga agsubli iti Pilipinas.

Nagasat pay laeng ti kalugaranmi ta saan pay idi a nainget unay ti imigrasion ti nasao a pagilian ket inikkanda pay iti pagpletena nga aggawid. No natiliw koma iti agdama, baka malungsot iti pagbaludan.

Ti tourist-worker scheme ti maysa kadagiti kangrunaan nga iskema nga iwaywayat dagiti ganggannaet nga employers nga agkasapulan unay kadagiti trabahador. Iti makadakes ditoy,  kaaduan kadagitoy nga employers ti blacklisted ken abusado ket agsipud ta turista ti nakalanad iti bisa dagiti mapan agtrabaho, sigurado a saan a maited kadakuada ti umno a sueldo, karbengan ken  benepisioda kas trabahador. Iti listaan ti POEA, iti pagilian a United Arab Emirates, Kuwait, Oman, Singapore, ken Malaysia ti kaaduan a pagsangladan dagiti “turista” a trabahador.

Escort Services. Iti daytoy nga iskema, kayarigan ti trabahador ti maysa a VIP (very important person) a maeskortan iti eropuerto wenno pantalan ket mapalubosanda a pumanaw uray awan dagiti kasapulan a dokumentoda nga agbiahe.

Ti dakkel a problema ditoy, adda iti ima ti employer ti pasaporte wenno bisa ti trabahador ket adda daytoy iti babaen ti kontrolna. Gapu ta awan ti iggemna a travel papersna, kayarigan ti trabahador ti nakapungo ti imana ken sakana a saan a makapa-naw iti pagtrabahuanna, ket awan ti gawayna piman uray marabngis ti kalinteganna a kas mangmangged.

     (Adda tuloyna)

Comments are closed.