Footer

SALAYSAY: Senador, indarumna ti Dios a maysa a terorista

Indarumna ti Dios. Daytoy ti nabara a tungtongan dagiti netizen itay napan a lawas nga intay met nakibiangotan. Saan laeng a ngimmato dagiti kidaymi  no di kaslakam  nagkabukab iti walopulo ket walo nga apro ti manok. Ta kasano koma nga idarummo ti Mannakabalin, ala man?

Wen, kailian, maysa a senador iti Nebraska (USA), ni Ernie Chambers, ti nangidarum iti Dios itay nabiit iti kaso a nainteroristaan a panagipangta, nasaknap nga ipapatay, pannakadadael ken pammutbuteng kadagiti minilmillion nga agindeg iti Daga (terroristic threats, widespread death, destruction and terrorization of millions upon millions of the Earth's inhabitants).

Ngem uray ti hues ket dina nagustuan ti darum. Impalapalna ketdi ti papel. Iti pay laeng pinaka-basic a procedure ti panagdarum, saanen a nakalusot. Ta kasano koma  nga idarummo ti awanan iti ‘existing’ nga adres? Numero ti balay, kalye, ili, probinsia wenno siudad? Adda aya met kasta iti Langit? No adda man bilang, asino ngarud koma ti mapan sadiay Langit a mangi-serve iti subpoena? Ania ti pagluganan a mapan sadiay Langit? Ken asino met ti nalimbong ti utekna a mangaramid iti subpoena a kasta?

Ti kunami, maysa  ketdi a panangbarengbareng iti Mannakabalin ti kastoy nga aramid. No di mamati iti Dios ti maysa a tao, dina koma met lilibegen dagiti mamati.  

Ta ammo met dagiti iturayanna a numero uno a kritiko ti kristianismo ni Senador Ernie Chambers.

Kuna  met dagiti sutil a normal kano daytoy kadagiti institusion wenno sadinoman, banag a napasarimadengkami. Kunada pay nga uray sadinoman, adda latta dagiti tumaud a pasamak a mangibunga iti isem no di man kinnuldit wenno innillekan iti liklikudan.

Kas iti napasamak met iti summer hearing ti Supreme Court iti Baguio. Maysa nga ubing nga abogado ti nagdarum ta nangabak iti kaso ti maysa a sigud a klientena. Dumawdawat ti abogado iti bagina uray no naikkaten  nga abogado iti kaso.

Naabak daytoy iti lower court. Nagapela iti Court of Appeals ngem naabak. Impanna iti Supreme Court. Katugtugaw pay laeng dagiti mahistrado, pirmin ti panangsabonda iti abogado. Kuna dagiti mahistrado a saan kano a pagkuartaan iti kinaabogado. Mabalinna latta nga ibbatan ti propesionna no kayatna. Napno iti katkatawa ti court room. Piman nga abogado, nabainan.

Iti maysa met laeng a court hearing, napasamak ti counter-examination iti witness. Ti abogado, kayatna a dadaelen ti character wenno kinatao ti witness tapno agparang a saan a credible witness daytoy ket iti kasta, saan a maikkan iti merito dagiti sinapataanna iti korte.

Kuna ti abogado: “Pudno kadi a maysaka a corrupt government official? Nga adun ti ginastosmo a kuarta ti gobierno? Pudno kadi nga uray la tallo dagiti ikabkabbalaymo a babbai malaksid iti legal nga asawam? Immoralidadka, saan kadi? Sumungbatka!” imbugtak ti abogado ngem nakatliaw iti hues. Kayatna ngamin ti agpa-impress iti hues.

Naulimek ti witness a tumangtangad. Inulit ti abogado ti insaona, ket kas iti sigud, nakataliaw latta ken ni apo hues.

Nanaltuok ti maliete ti hues. Kunana: “Witness, sumungbatka, please!”

Kuna ti witness: “Ha? Kunak man, Judge, no sika ti pangibagbagaanna iti corrupt ken babaero ta sika met ti taltaliawen ni abogado?”

Napno iti katkatawa ti court room.

Wen, adda dagiti tumaud a pasamak a pagiseman iti uray sadinoman. Uray iti maibilang a naserioso a lugar a kas iti korte, tumaud latta met ti pagkakatawaan. Normal ken nasalun-at a banag? Wen  la.#

Comments are closed.