Footer

SARITA: Agpakasaren ni Uliteg Antokoy (Maudi a paset)

“Kakaisuna a bunga ti innarasaasmi ken ni baket ti dawatenyo. Diak ngarud iyawat a kasla mama. Masapul a masiguradok ti napintas a masakbayanna. Ita, damagek kadakayo, maitedyo kadi amin a dawatek?”

“Saggaysaem nga ibugasan, padre,” inkarigatan latta ni uliteg ti immisem nupay kimmaro ti ragutok ti barukongna kas ipasimudaag ti ipupuraw dagiti nalitem a bibigna.

“Umuna, adda met la umaponanda?”

“Ay, ket nupay saan a kas itoy taengyo ti kinadaeg ti pagtaenganmi, ipasiguradok a natalgeddanto didiay balay,” nasierto a sungbat ni uliteg Antokoy.

“Daga?”

“Adda met bassit ipatpatalonmi, kabsat,” ni Anti Mayyang met ti simmungbat.

“Taraken a baka?” impasaruno ni Tang Godo a dinamag.

“A! e! daytan a ti awan padre,” imbeddal ni uliteg.

“Ania? Awan uray la no dua ti sakana?” immulagat ti dinanonda.

“Awan, padre, ta kas kunak, nasitsiti iti yanmi ngem ditoy isu nga awan ti pagpasturan.  Awan uray manok a dua ti sakana a kunam. Ngem adda tallo ti sakana, he!he!” insungbat manen ni Antokoy.

“Tallo ti sakana? Ania dayta?” kasla nakigtot a saludsod ni Tang Godo.

“Aso, padre, a kurang ti sakana gapu ta napilidan, he!he!

“Ala! Ala! Saan a balen. Sumaruno, kayatko a baro ti isuot ni Nadia a trahe de boda. Diak kalikagum a tay aramid ni Paulo Gucci wenno ni Versace ngem ketdi masapul a baro. Diak kayat tay narentaan. Maitedyo, kakabsat?” immulagat manen ni Tang Godo ti kasla sibeg a matana.

“Ikarigatanmi a kabsat,” insungbat ni Anti Mayyang.

“Ala, nasayaat. Intayo iti maparti.”

Ad-addan ti ipupuraw ni uliteg Antokoy idi ibaga ni Tang Godo a lima a baka, walo a baboy, sumagmamano a kalding ken 45 days a manok ti kayatna a maparti. Sabali laeng ti kilawen a tanggigi ken gasut a matuno nga ampapakol ken sungayan.

Saanen a kinuntestar daytoy ni uliteg malaksid iti dua nga immuna. Intawarna a tallo la koman  a baka ken lima a baboy ti maparti. Arintukiaden ni Tang Godo ngem nayat met laeng idi ibaga ni uliteg a sukatandanto laengen iti dadakkel a rasa kada padaw. Ammok lattan a kurimesento ni uliteg ti piskaria ni adingna nga Abby. Ultimonto a saanna a bayadan uray agar-arikiakto ni kapid Roldan a mapan agsingir kas iti napasamak idi nagkasar ni kapid Olga.

Natulag met ti sagduduapulo a kaban ti bagas a kas pangrugianto dagiti agassawa ken siento singkuenta mil ti sab-ong. Gapu ta moderno ti biagdan iti Ammubuan City, binay-anen ni Tang Godo ti nagubbaan kada sinusuan a nagyamanan iti kasta unay ni uliteg Antokoy. Urayna la nabisong ti pingping ni Tang Godo a napakiet iti panna-kaisagid ti napuskol a bigote ni uliteg.

Maivideonto ken maretrato ti seremonia babaen ti Rock-Stone Video Productions a kukua tay cameraman ni uliteg a ni Kelly.

Addakamin iti uneg ti dyip idi  adda ipakamakam ni Tang Godo.

“Kunam, abalayan, a journalistka.”

“Wan hanred persent, abalayan,” insungbat ni uliteg.

“No kasta, kayatko a maipan iti BANNAWAG ti ladawantayo inton kasar,” indawat ni Tang Godo.

“No problem. Bay-am ta tawagak ni kompadre Anib ta saanto la a maysa, no di tallo ti ladawantayo ti maipablaak iti Tao, Lugar, Pasamak,” impatalged ni uliteg ket naginnapirda iti abalayanna.

Agalas diesen ti rabii idi dumanonkami barangaymi.  Pinasardeng ni uliteg ti lugan. Dimsaag ket gimmatang iti round post. Dimmagaskami itay iti Sikatuna gimmatang iti pulotan a kaliente. Pagsangnguanmi kano sakbay a mangrabiikami.  Dinamagna no ania ti rimmuar iti hueteng. 9-26 kano.

Uray la nadanog ni uliteg ti angin. Pimmuro. Anian ta imbes a 6 nagbalinsuek a 9.

Maysa ketdi a sobre ti inyawat ni Manang Lucing kenkuana. Inted kano ni Tata Limon a kartero.

Agtartarayen ti lugan idi nagriaw ni uliteg. Nangabak kano ti entryna iti panagsurat iti salaysay iti 4th PopDev Media Awards.

Ngem naglumen ti ragsak ni uliteg idi maungpotna a basaen ti surat. Minor prize gayam ti inabakna. Adda pakonsuelo a lima ribu a gunggonana.

Saan a matimtimek ni uliteg idi dumanonkami iti balayda. Dinak pinalusposan nga agawid ta rambakanmi kano ti umadani a panagpakasarna.

Idi maguduami ti round post, mangrugin a lumabaga ni uliteg ken rimmasaw.

“Hammom, kaanakan, dakkkeeel a leksion ti naadalko iti daytoy a p-panagpakasarko….” imbeddalna. “N-nagbalandra kanniak ti hinnarammmidko idi immay dimmanon da abbbalayan…

Diak simmungbat. Intangnguapko ketdi ti nabati iti basok.

“N-ngem kkkasta ti biag, ssaan kadi, kaannnakan???” nasaprianak pay gapu iti kinaasideg ti rupa ni uliteg. “Aaah… no hania ti immmulammm, isut hapitemmm!

“Ay, lakay, nabartekkan,” kinuna ni Ati Mayyang idinto nga inseniasna nga aglibasakon a pumanaw.

Nagpampabarak a mapan umisbo. Addaakon iti ridaw idi impalapal ni uliteg ti kantana a Nagimaskan, Mayyang….

Nagwingiwingak. Ngem idi tumangadak, kasla agsalsala dagiti agkirkiray a bituen iti tangatang a mangdangdanggay iti sintonado a kanta ni uliteg Antokoy .#

Comments are closed.