Footer

2 naiwawa a mangngalap, nakaawiddan

SAN ESTEBAN, Ilocos Sur – Maysa a barko nga agturong iti Japan ti nangalaw iti dua a mangngalap a naitawtaw iti taaw.

Nakaanges iti nalukay ti pamilia da Ronnie Cabradilla, 29,  ken ni Eldy Ray, agpada a residente ti Barangay Apatot ditoy a naireport a naitawtaw iti baybay kalpasan a napattog ti bilogda idi makaawatda iti mensahe nga inalaw ida dagiti tripulante ti maysa a barko nga agturong iti Japan.

Kinuna ni Fernalyn Cabradilla, 33, asawa ni Ronnie, a kasla nabunotan iti dakkel a siit idi makaawat iti mensahe manipud iti asawana a nasayaat ti kasasaadda kalpasan a naalawda iti taaw babaen ti maysa a barko.

Segun iti pamilia dagiti dua, nagpataaw dagitoy idi Nobiembre 12 ngem napattog ti bilogda gapu iti dadakkel a dalluyon a pinarnuay ti nagsubli a Bagyo Quinta ket nagkatangkatangda iti taaw iti dua nga aldaw.

Nupay kasta, kalpasan ti pannakaalawda, saanda a nakasubli nga insigida ta agturong ti barko iti Japan.

Impaima ti kapitan ti barko dagiti dua a mangngalap iti autoridad ti Japan idi makasangpetda iti dayta a pagilian idi Nobiembre 18.

Babaen ti tulong ti embahada ti Filipinas iti Japan, naiyaramidan dagiti dua dagiti kasapulan a dokumento para iti madagdagus a panagawidda iti pagilian.

Mismo a ni Mayor Chester Elaydo ti napan nangsabat ken nangsukon kadagiti dua iti eropuerto iti Manila.

“Nakasagana ti municipal government ti San Esteban a tumulong kadagitoy mangngalapmi tapno makasublida,” kinuna ni Mayor Chester Elaydo bayat ti interbio kenkuana ti DZTP.

Kabayatanna, impatangatang ti  pamilia dagiti dua a mangngalap ti pakpakaasida a maisubli koma dagiti bilog kadakuada agsipud ta ti panagkalap laeng ti pagbibiaganda.

Daytoy ti maikadua a daras a naitawtaw ni Cabradilla iti taaw.#

Comments are closed.