Footer

BANNER NEWS: Desision ti SC a mangisubli iti Batac kas ili, mapilaan iti motion for reconsideration

BATAC CITY – Mangipila dagiti agtuturay ditoy iti motion for reconsideration iti Korte Suprema mainaig iti impaulogna a desision a mangisubli iti estado a munisipalidad  ti 16 a kabarbaro a siudad a pakairamanan daytoy a siudad.

Kinuna ni City Mayor Jeffrey Nalupta nga isagsaganan ti abogadoda  ti mosionda para iti rekonsiderasion ti SC iti sanguanan ti panagreklamo dagiti agindeg ditoy iti desision ti Nangato a Pangukoman a mangisubli daytoy a siudad iti estadona a kas ili.

Indeklara itay nabiit ti Korte Suprema a agsubli dagiti 16 a kabarbaro a siudad kas ili agsipud ta unconstitutional ti linteg a nangitag-ay kadakuada iti kinasiudad gapu ta sinalungasingna ti Local Government Code.

Karaman dagiti 16 a kabarbaro a siudad a mapasubli a kas ili ti Baybay iti Leyte; Bogo iti Cebu; Catbalogan iti Samar; Tandag iti Surigao Del Sur; Borongan iti Eastern Samar; Tayabas iti Quezon; Lamitan iti Basilan; Tabuk iti Kalinga; Bayugan iti Agusan Del Sur; Mati iti Davao Oriental; Guihulngan iti Negros Oriental; Cabadbaran iti Agusan Del Norte; Carcar iti Cebu; El Salvador iti Misamis Oriental; and Naga iti Cebu province; ken daytoy a siudad.

Nagbutos a pabor iti desision da Chief Justice Reynato Puno ken Associate Justices Leonardo Quisumbing, Alicia Austria-Martinez, Conchita Carpio Morales, Presbiterio Velasco Jr. kenArturo Biron.

Kimmontra da Associate Justices Ruben Reyes, who wrote a dissenting opinion, Renato Corona, Adolfo Azcuna, Minita Chico-Nazario ken Teresita Leonardo-De Castro.

Saan a nagbutos da Associate Justice Dante Tinga ken Associate Justice Antonio Nachura, agpada a dati a diputado, idinto nga on leave ni Associate Justice Consuelo Ynares-Santiago.

Segun iti Korte Suprema, inamendaran ti R.A. 9009 ti Section 450 ti Local Government Code a mangingato iti tinawen a mapastrek a requirement ti maysa a munisipalidad manipud iti P20 million iti P100 million para iti panagbalinna a maysa a siudad.

Nagepekto ti R.A. 9009 idi Hunio 21 wenno innem a tawen sakbay a naipasa ti linteg ti cityhood.

Sinarurongan ti Korte Suprema ti petision ti  League of Cities of the Phils a nangkuestionar iti cityhood ti sumagmamano nga ili gapu iti saanda a panangsurot iti annual income requirement a P100 million.

Kinuna pay ti Liga babaen ti petisionda a gapu iti “wholesale conversion” dagiti munisipalidad a siudad, bumassit ti bingay dagiti existing a siudad iti internal revenue allotment agsipud ta umad-adu dagiti siudad nga agbibingay iti IRA a mailatang para kadagiti amin a siudad.

Kinuna ti Nangato a Pangukoman a “nalawag ti linteg, masapul a suroten dagiti criteria a naipalaon iti Local Government Code, saan ket a ti sabali a linteg, iti pannakabuangay iti local government units.”

Ngem kinuna ni Vice Governor Atty. Wendell Chua, agindeg ditoy, sinurot ti gobierno munisipal dagiti requirements idi nagpetisionda para iti panagbalinna a siudad.#

Comments are closed.