Footer

EDITORIAL: Awan duri ti BoC a mangiyimplimentar iti EO 156?

Awan makitami nga abut iti Executive Order 156 tapno saan a mayimplimentar ti Bureau of Customs (BoC). Nalawlawag pay ngem agmatuon daytoy: “The importation into the country, inclusive of the freeport, of all types of used motor vehicles is prohibited…” Inclusive of the freeport, kunana. Nakalawlawag: maiparit amin a puerto ti agimport kadagiti used vehicles wenno dagiti second hand a lugan, lalo kadagiti van a reconditioned ken agipugso iti nangisit nga asuk.

Kas kalawag ti agmatuon ti exception: dagiti laeng behikulo a personal use dagiti returning resident wenno immigrant, dagiti aramaten dagiti diplomatic corps babaen ti pammalubos ti Dept. Foreign Affairs. Ngem mairehistro a dagus dagitoy.

Umalingawngaw latta ti Port Irene a serkan dagiti luxury cars ken dagiti used cars  idinto a karaman iti ban kas sagudayen ti EO 156 daytoy a sakup ti Cagayan Export Processing Zone (CEZA).

Iti opinion ti solicitor general itay nabiit, karaman ti CEZA ti EO 156. Awan ngarud ti rason a saan a yimplimentar ti Custom daytoy.

Idi agtapos ti dekada 1990s, nagbalin a basuraan ti pagiliantayo  kadagiti daan-a-napintaan ken na-reconditioned a luglugan manipud Japan ken Korea. Isu a naaramid ti EO 156. Ngem agingga kadagitoy nga aldaw, makakitatayo pay laeng kadagiti imported used bus a maar-aramat kas tourist bus ken for hire iti ima dagiti pribado a saan met a kameng ti diplomatic corps wenno returning immigrants.

Adda commitment ti Filipinas iti sangalubongan maipapan iti nadalus nga angin nga angsen.  Saan koma nga agimmumulagat wenno agindidiammo iti linteg ti BoC tapno dina yimplimentar daytoy a linteg a naaramid pay la idi 2002.

Sungsungbatan ti pagilian ti commitmentna iti sangalubongan maipapan iti pollution ken global warming no agtultuloy ti panagraira dagitoy a used cars. Panunotentayo koma nga adda ti Republic Act No. 8749 otherwise known as the Philippine Clean Air Act (CAA) of 1999 ket naaramid daytoy tapno ipromot ken protektaranna ti aglawlaw ken law-angna kontra iti polusion nga agtaud manipud kadagiti asimbuyok dagiti lugan ken kaarngina kas dagiti incinerators a maiparit nga usaren dagiti amin a nadudur-as a nasion ngem ipappapilit dagiti sumagmamano nga investors nga aramaten ti Pinas.

Malaksid dayta, patayen ti importasion dagitoy a segunda mano a luglugan ti industria ti panagpartuat iti lugan ditoy pagilian. No matay dagitoy a kompania, makissayan ti buis nga agtaud kadakuada. Maawanan iti trabaho dagiti adu a trabahador. Adu ti agbisin a pamilia.

Agtignay koma ti turay tapno saluadanna ti industria ti panagaramid ti lugan ditoy pagilian babaen ti nainget a panangiparitna iti panagangkat kadagiti segunda mano a lugan.

Ngem kapaliiwan nga awan ti duri ti BOC a mangiyimplimentar iti EO 156.#

Comments are closed.