Footer

Nagtakaw iti hardware store, naipiskot dagiti polis

CANDON CITY –  Natiliw ti maysa a lalaki a nainbolbar iti panagtakaw iti Narvacan, Ilocos Sur gapu iti panangsublida iti inabandonada a lugan nga inaramatda a naglibas.

Naipilaanen iti kaso a panagtakaw ni Danny Pangilinan, agnaed iti Efza, Angeles City, Pampanga, Rogelio Tayab ken Roldan Tayab, agpada a residente iti Mabalacat, Pampanga. Birbiroken dagiti polis dagiti ag-Tayab.

Segun iti polis ditoy, nakaawatda iti flash report nga adda naiwayat a panagtakaw iti maysa a hardware store iti Limmansangan, Narvacan, Ilocos Sur ket naglibas dagiti suspetsa a nakalugan iti Honda Civic, light blue, addaan plaka LF-723, nga agturong iti abagatan a direksion.

Insigida a nangiwayat da PCI Marlo Castillo, hepe ti polis ditoy, iti checkpoint iti national highway ngem idi pinarada ti lugan, saan a nagsardeng no di ket nagpakaskas nga immadayo.

Saan a nakamatan dagiti polis ti lugan.

Karabianna, inreport ni Bagani Ubbog Barangay Captain Delfin Gagto, nga adda naabandona a kotse iti barangayda.

Iti kabigatanna, dua a lalaki, da Danny Pangilinan ken ni Domingo Dauz ti napan mangala iti kotse. Dagus a tiniliw dagiti polis dagitoy sada impaima iti polis ti Narvacan.

Saan a nairaman a nakasuan ni Domingo Dauz, residente iti Oyaoy, Bacnotan, La Union, agsipud ta isu ti drayber ti rent-a-car firm a nangalaan dagiti suspetsa iti lugan.#

Comments are closed.