Footer

SALAYSAY: Illegal Recruitment: Dagiti panglakagan tapno makapuslit nga agtrabaho…. (Tuloyna)

Backdoor exit

Gapu iti pannakalawlaw ti pagiliantayo iti baybay, dakkel a problema dagiti autoridad ti pannakabantay dagiti nadumaduma a coastal towns. Saan ngarud a nakakaskasdaaw a masansan a makadamagtayo iti ismagling dagiti produkto, appliances ken uray dagiti motorsiklo ken behikulo. Maipuslit dagitoy kadagiti nasulinek a coastal barangays sada mailimed a maiserrek kadagiti pagtagilakuan. Adda dagiti alegasion nga adda pannakaammo dagiti agtuturay kadagitoy a lugar iti mapaspasamak ngem posible nga awan ti mapaliiw wenno maangotda, wenno italiawda ti rupada iti sabali a direksion agsipud ta adda maitanggaya iti sirok ti lamisaan. Saan a mailibak a dakkel a panguartaan ti panagipuslit ditoy pagilian.

Iti Kamindanaoan laengen, dita ti mapapati a pakaipuspuslitan dagiti CD, DVD, radio ken dadduma pay a paglinglingayan. Dagitoy dagiti ilaklako dagiti Muslim kadagiti tiendaan publiko, kadagiti sidewalk ken ipaspasiarda kadagiti il-ili.

Makadamagtayo no dadduma iti panagreid dagiti polis ngem kalpasan ti sumagmamano nga aldaw a panagpalamiisda, agraira manen dagiti pirated goods kadagiti tiendaan ken kalsada.

Ngem ti kadaksan, gapu iti kalawa dagiti igid ti kabaybayan a sakupen dagiti agtuturay a siputan, saan a malapdan ti iseserrek dagiti alien nga umay agindeg ken agnegosio ditoy pagilian, kasta met ti ipapanaw dagiti kailiantayo a trabahador tapno mapanda nga illegal a mangged iti sabali iti pagilian.

Nalawa iti umabagatan a rummuaran dagiti trabahador a Pinoy ken saan pay a nainget ti imigrasion.

Kaaduan nga agturong dagiti kailiantayo a trabahador kadagiti kaarruba a pagilian a kas iti Malaysia. Agluganda iti cargo ships wenno bangka iti panagturongda kadagitoy a pagilian. Saan a kasapulan ti working visa iti ipapanda kadagitoy a pagilian ket nadarasda ngarud a makasarak iti trabaho. Ngem maibilangda latta nga illegal alien agsipud ta simrekda iti nasao a pagilian babaen ti panagpuslit.

Itay laeng nabiit, pinullo a trabahador a Pinoy ti napagawid ditoy pagilian kalpasan nga inwayat dagiti agtuturay iti Malaysia ti naing-inget a pannakamonitor dagiti ganggannaet a trabahador iti pagilianda.

Assumed Identity

Maysa a nadaras a panglakagan tapno makapan iti ballasiw taaw ken makatrabaho sadiay ti maysa a kailian babaen ti panangaramatna iti sabali a nagan.

Kas iti maysa nga am-ammomi a birngasantayo laengen iti Berto.

Agtawen laeng ni Berto iti 16 idi mapan agtrabaho iti sabali a pagilian. Nupay kasta, kasla aglanglanga a 20 ti tawenna gapu ta nabaneg ken linuto ti init ti kudilna iti panagkalkalapna.

Agsipud ta ubing pay, saan a makapan agtrabaho daytoy iti sabali a pagilian. Tapno makaluban ti kinaganusna, inaramatna ti nagan ti ulitegna nga agtawen iti 22 iti laksid ti pannakaammo daytoy.

Lima a tawen a nagtrabaho ni Berto iti abroad. Nagtaltalek a saan a maduktalan ti panaglabsingna iti linteg ngem kastay kunadan, uray ikutkotmo iti kaunegan nga abut, addanto latta panawen a lumtuad ti kinapudno.

Nagaplay iti trabaho ti ulitegna a mapan iti Middle East. Ngem idi mangala iti clearance manipud iti National Bureau of Investigation para iti pasaportena, ditan a natakuatan nga adda gayam kanagnaganna. Dita a naammuanna a ti gayam kaanakanna ti nangaramat iti naganna.

Daytoy a pasamak ti nangrakrak iti nasinged a panaglalangen dagiti pamilia dagiti dua.

Daytoy a panglakagan ti masansan nga aramaten dagiti mananggundaway nga agrekrekrut iti trabahador a mapan iti Taiwan ken Japan. Pumanaw dagiti trabahador babaen ti sabali a kinatao. Aramatenda ti pasaporte ti sabali a trabahador babaen ti makunkuna a “baklas system” wenno panagpasaporteda nga agaramat iti peke a birth certificates ken dadduma pay a dokumento.

Kaaduanna a menor de edad dagiti mabikbiktima iti babaen daytoy nga iskema.

       (Adda tuloyna)

Comments are closed.