Footer

SARITA:Dungdungnguenkanto Unay Unay (Umuna a paset)

“DIKA la ketdi umay ditoy nanumo a pagtaengak, Atty. Gonzales, no saan a napateg ti gagaram,” kinuna ni Noli kalpasan a pinagtugawna ti sangaili iti immaratiddog a sopa iti salas.

“Wen, Noli. In fact, binaonnak ni papam…” imbitin ti abogado ti sumaruno a sawenna  ket tinaliawna ti naulimek ken nakadumog  a babai iti wheelchair. Immanges iti nauneg sana pinerreng ni Noli.

Naawatan ni Noli ti italtalukatik dagiti mata ti abogado. Kayat la ket daytoy nga agsoloda nga agsao nga awan ti makangngeg. Daydiay duada laeng. Napateg la ketdi ti gagara daytoy abogado.

“Trisha, isurotmo man ni manangmo iti panagpurosmo kadagiti sabong ti rosas. Makatulong kenkuana no mainitan ken makalang-ab iti sadiwa nga angin,” imbilin ni Noli iti balasang a caregiver. Nagtung-ed ti balasang nga umis-isem ta kasla maayatan ti naka-wheelchair iti nangngegna.

Insurot dagiti dua lallaki ti matada iti likudan dagiti rumrummuaren iti ridaw a kumamang iti sementado nga alley nga agturong iti kamasetasan. Maleggakan ti init ti hardin. Mula ti asawana dagiti nagduduma a masetas – idi di pay naibalud iti wheel chair.

Apaman a nakaruar dagiti dua iti salas, linuktan ti abogado ti nangisit nga attaché case a nakaparabaw iti sarming a center table. Nangiruar kadagiti papeles. Iniddep met ni Noli ti stereo kalpasan a nagpatinggan ti sonata a “Dungdunguenkanto…”

“Please sign these papers, Noli.”

“Ta ania dagita a papeles, Atty?”

“For annulment papers iti kasaryo…”

“What?!” naingato pay ni Noli ti timekna. Napanganga ken nagmulagat. Sanna a ninamnama dayta nga ibaga ti sangailina nga abogado. “What annulment are you talking about, attorney?”

“Look, Noli, imbaonnak laeng ni papam to do this. Ipa-annul ti kasaryo iti asawam. That’s it!” Dua nga ima ti abogado a nakuttong ken agedad iti nasuroken nga innem a pulo ti nagkumpas, nga adda buyogna a libbi. Iti tayagna a lima a kadapan ken siam a pulgada, bagayna  la  unay ti terno nga amerikana a suotna.

“To hell with that, attorney! I didn’t file any annulment case or intend to do so!”

“But this is what your father wants you to do.”

“Then tell him I won’t! Kunak la no ania itayen ti napateg a gagaram, attorney, ngem gayam, kaskala aso nga agtungtungpal iti bilin ti amona.”

“I’m just doing my job, iho. Uray no agsinakayon iti asawam, agtultuloy latta met ti sustentom kenkuana ken iti anakmo. Adda iti linteg dayta.”

“Saanko a magustuan daytoy a saritaanta, attorney. No awanen ti naimbag pay nga ibagam, mabalinmon iti pumanaw. Dimo koma gamden nga uliten daytoy. Pangaasim…” timmakder ni Noli. Nakalawlawa ti nganga ti inlukatna a ridaw. Napait ti isem ti abogado a nangurnos kadagiti papeles sana insubli iti attaché case.

“MAMA, ala wen, aminek a saanak a naimbag nga anak, ngem ikarik, agbalinak a naimbag nga asawa ken ama…” nakadumog ni Noli a nangisawang kadayta a malem a sangailina ti inana, dua nga aldaw ti napalabas kalpasan a nasangailina ti abogado ni papana.

“Dayta ngamin ti pagayatan ni papam. Obsessionna a mamanugang ni Renely. Diak a maawatan no dadduma ti amam, anak. Diak met kabaelan a dupiren ta linteg dagiti saona.”

“Mama, saan a magatadan ti kuarta ti ayat. Saanko a basta lattan panawan ken isina ti asawak iti daydiay a kasasaadna. Uray kadi sika, mama, ket dinak maawatan?”

“Ladingitek iho. Agtungtungpalak laeng iti pagayatan ni papam.”

“Addaanak iti bukod a pangngeddeng, bukod a rikna, mama…”

“Ay-ayatennaka ni Renely, iho…”

“Isu laeng ti agay-ayat, mama, awan ti uray maysa a dutdotko a sumgar kenkuana!”

“Kitaem dagiti tallo a kakabsatmo. Narang-ay ti biagda ta ni papam ti nagpili iti asawada.”

“Ngem dida naragsak, mama!”

“Kuna ni papam, laksidennaka ken dinakanto ikkan iti tawidem kadagiti negosiotayo?”

“Diak pagan-ano ti kinabaknang no saanak met a nawaya ken naragsak, mama. Ladingitek unay, ngem nakaruarakon iti tangkal ni papa. Diakon kayat ti agsubli nga agpupok iti uneg. Naragsakakon nga agtaytayab iti bukodko a langit, mama. Nawaya nga agtayab ken mangbuya iti kinapintas iti ruar ti tangkal ni papa. Ay-ayatek ti asawak, mama. Ay-ayatek ti anakko. Sika ti nangisuro kaniak nga agayat, ngem apay itan a sabidongam metten ‘toy panunotko? Mama, please, ammok, mariknak, masaksaktanka iti ar-aramidem. Dimo la ketdi kayat ti mapaspasamak. Ngem awan ti timekmo. Apay, mama? Apay? ”

Saan a nakatimek ti ina.

(Adda tuloyna)

Comments are closed.