Footer

EDITORIAL: Hustisia para kadagiti naipalnaaw a journalist

Itulodna koma iti eskuelaan ti anakna nga agtawen iti pito ngem ginudas dagiti armado a tattao a nakamotorsiklo.

Ni Aristeo Padrigao, anchorman ti DZRS Radyo Natin ken kolumnista ti Mindanao Monitor Today, ti maikanem a journalist a napapatay iti daytoy a tawen ken maika-61 manipud 2001.

Iti ipapatay ni Padrigao, nagultimo metten ti panangiwarwaragawagna iti kinasaknap ti illegal logging iti lugarda ken ti nalabes a graft and corruption iti Siudad ti Gingngoog. Ngem kinatakrot ken kinamunnel nga aramid daytoy a mapaspasamak. Apay a patayen ti tao a mangiwarwaragawag iti kinapudno? Nakababain nga aramid iti mata ti lubong.

Agsagsagrap la ket ngarud ti Pilipinas kadagiti pammabalaw gapu kadagiti alegasion iti extra-judicial killings ken detenido y desaparcido ken ti kaapiringna a pannakarabngis iti human rights.

Ngem agingga iti saan a agpullo dagiti agisayangkat iti pammapatay, addanto pay sumaruno ken ni Padrigao. Umatiddogto latta ti listaan dagiti agirakrakurak a naipaalnaw iti rabii nangruna no adda nabaddekanda a tangan ti saka iti panangibambandoda kadagiti dakes nga aramid.

Sabalin ti imahe a turongen ti kagimongantayo. Kayarigannan ti ‘umok’ dagiti aso, agnginginnernger, agsisinnikbab, agdidinnangir. Ti katibkeran ti sangi ti agari ket maiwalin ken makugtaran laeng dagiti awanan gaway ken nakapsut. Daytoy kadi ti klase ti gimong nga ipatawidtayo iti sumaruno a kaputotan?

Iti kinaadun ti pammapatay kadagiti katrabaho ken panagpukaw dagiti sumagmano a tattao, agpatingga laeng daytoy a suyep iti panagtayok ti estadiska. Estadistika a manmano ti mangayat a mangpuyot iti silbato ta isu met ti magudas a sumaruno.

Saan a mabalin nga ibaga a ‘kasta la ti biag’ wenno ‘awan ti maaramidan.’ Adda maaramidan no kayat. Makauman a denggen dagiti balikas a pampakalma laeng wenno dagiti balikas a nangiligsayan iti pasamak ken pangliklikan iti pammabalaw. Dagiti balikas a nagawit iti kari. Dagiti kari a paborito nga itayab dagiti kali. Ngem ti agdadata a kinapudno, inton nagbaaw ti isyo, agbalinto a dapo ket ipalais iti angin.

Saanmi a maawatan no apay a maaramat ti milliones nga intelligence fund ti kapolisan a gastosen dagiti nangangato nga opisial ken ti asawada iti ipapanda iti ballasiw-taaw. Apay a di usaren dagitoy a pundo para iti panangtunton iti hustisia dagiti nagudas iti kaltaang ti rabii ken uray iti katengngaan ti aldaw?

Kondenaenmi ngarud iti kangatuan nga agpang daytoy a pammapatay kadagiti journalist. Kondenaenmi iti saanmi a pannakakita iti uray sangkabassit laeng koma a lawag a mangited iti namnama a mapasardeng dagitoy a pammapatay ken panagpukaw.

Kunami iti kadagsenan a balikas: agtignay koman amin a maseknan iti urnos ken talna tapno agsardengen dagitoy a pammapatay! (jim agpalo)

Comments are closed.