Footer

Police officials, diputado, nadismaya iti pannakaibasura ti shabu lab case kontra dati a COP

SAN FERNANDO, La Union – Nadismaya ti maysa a kongresista ken maysa nga opisial ti polis ditoy gapu iti pannakaibasura ti kaso maikontra iti dati a hepe ti polis ti Dagupan City ken tallo pay a polis ken maysa a sibilian mainaig iti naraut a laboratorio ti droga iti maysa a barangay iti Naguilian, La Union.

Kinuna ni La Union 2nd District Cong. Tomas Dumpit, Jr. a naklaat ken nadismaya idi nadamagna nga imbasura ti panel a binuangay ti Department of Justice nga agimbestiga iti kaso maikontra kada dati a hepe ti polis ti Dagupan Supt. Dionicio Borromeo, PO3 Joey Abang, PO1 Rodolfo Damian, Jr. ken PO2 Walter Banan ken ni Eusebio Tangalin, akinkukua iti lote a nakaipasdekan ti laboratorio.

Ni Dumpit ti akindistristo iti lugar a nakaipasdekan iti shabu lab.

Iti resolusion a pinirmaan da Prosecutors Florencio dela Cruz Jr., Bernardo Parico, ken Diosdado Solidum Jr., kinunada nga awan ti ebidensia a nakitada tapno makasuan dagiti akusado iti korte.

Inrekomenda ketdi ti DoJ ti pannakaisaklang ni Joselito Artus, alias George Cordero, mapapati a financier iti nasao a laboratorio, iti panaglabsing iti R.A. 9165.

Kabayatanna, kinuna ni Police Senior Supt. Noli Taliño, La Union provincial director, a dismayado iti pannakadismis ti kaso ngem respetarenna ti desision ti DoJ panel of prosecutors.

Kinuna met ni Deputy Police Regional Director Romeo Gatan, pangulo ti Task Force Bimmotobot nga awan pay ti naawatda a kopia ti resolusion ket berberipikaranda pay ti kinapudnona.

Rinaut dagiti nagtitipon a bunggoy dagiti polis ti laboratorio ti shabu iti Barangay Upper Bimmotobot, Naguilian, La Union idi Hulio 9 daytoy a tawen a nakasamsamanda kadagiti ramramit ken kemikal a maar-aramat iti panagpartuat iti droga.

Segun iti polis, makapartuat ti nasao a naraut a laboratorio iti agpateg iti P1 trillion a shabu.

Nupay kasta, sumangsango pay da Borromeo ken dagiti tallo a polis iti administrative case mainaig iti naraut a shabu lab.

Nasuspenso dagitoy bayat ti pannakaimbestiga iti mapapati a pannakainbolbarda iti operasion ti nasao a laboratorio ti droga.#

Comments are closed.