Footer

SALAYSAY: Illegal recruitment: napigsa a panguartaan dagiti manangallilaw (Maikatlo a paset)

Trainee-Worker Scheme.

Iti umuna a panagkita, awan ti aberia daytoy a wagas ti panagrekrut kadagiti trabahador, a kangrunaan a pakaseknan dagiti estudiante ken dagiti awanan iti padas iti trabaho.

 

Iti babaen daytoy nga iskema, marekrut ti maysa a trabahador a kas trainee ket mapan agsanay iti sabali a pagilian para iti serkanna a trabaho. Adu dagiti maallilaw iti daytoy nga iskema gapu iti panamati dagiti mapan agsanay nga apaman a maturposda ti traineeship program, maawatda a dagus iti trabaho.

Ngem ti saanda nga ammo, maysa laeng daytoy a pamuspusan dagiti illegal a recruiter tapno makaalada iti trabahador a saan nga aglasat iti nainget a proseso a kasapulan iti ipapan iti sabali a pagilian.

Kas iti impalgak ti Philippine Overseas Employment Administration iti maysa a forum a naangay iti Bohol, adda dagiti naduktalanda a ganggannaet a pagadalan nga agaw-awis kadagiti estudiante a mapan agbasa wenno agsanay nga agtrabaho iti hotel iti sabali a pagilian.

Maysa nga opisial ti POEA ti nagkuna nga adda pay dagiti estudiante nga addan bisada uray sakbay a nagturposda iti kolehio, banag a nakadidillaw agsipud ta agtinnag la ketdi dagiti narekrut nga irregular migrants, awanan iti umisu a dokumento iti panagbiaheda ken panagtrabahoda iti sangladanda a pagilian.

Ti makadakes ditoy, agtungpal a biktima dagiti mapan agsanay iti pannakaabuso. Maduktalandanto laengen apaman a sumangladda iti pagilian a pagsanayanda a sabali a trabaho ti pagtinnaganda a masansan a pakaisagmakan ti kinababaida wenno pannakairurumenda.

Dagiti la unay babbai ken ubbing ti kangrunaan a biktima iti daytoy nga iskema gapu iti kaawan gawayda iti pannakarames wenno pannakaabusoda a seksual, kinuna ti POEA.

Kas ken ni David, Filipino nga agtrabtrabaho iti Korea iti maysa a paktoria ti makina iti Yangsan iti Abagatan a probinsia ti Kyongsang. Nakastrek ni David iti trabahona babaen ti trainee scheme.

Manipud iti alas 9 iti bigat agingga iti alas 9 iti rabii ti panagtrabaho ni David iti nasao a paktoria. Agsueldo koma ni David iti 340,000 won ($309) ngem 152,000 won laeng ti it-ited ti bossna agsipud ta iduldulin daytoy ti nabati amangan kano no aglibas ni David.

Nalawag a maab-abuso ti kalintegan ni David a trabahador. Ngem agul-ulimek lattan ta mabuteng nga ipulong ti bossna iti illegal nga estadona no agreklamo.

Madakamat ditoy a gapu iti panagkurang dagiti trabahador iti pabrika gapu ta narugit, napeggad ken saan a kayat dagiti South Koreans a sumrekan, inwayat ti gobiernoda daytoy trainee scheme tapno mapalubosan dagiti ganggannaet nga agtrabaho a temporario iti pagilianda.

Dayta ti gapuna nga adu a ganggannaet iti nakastrek nga agtrabaho a temporario iti South Korea.

Ngem ti makadakes, adu a trabahador ti agtrabtrabaho ita iti South Korea nga illegal gapu ta dida makaakkal iti trabahoda agsipud ta nailumlomdan iti utang ken mabutengda a maduktalan ken mapaggawid.

Tie-up or Kabit System.

Iti babaen daytoy a sistema, makikabit ti saan a lisensiado a recruiter iti lisensiado a recruitment agency ket agawat kadagiti trabahador nga aramatenna ti lisensia ti lehitimo a recruiter.

Yan ti pagdaksan daytoy a sistema, maar-aramat ti nagan ti lisensiado a recruitment agency para iti maikaniwas nga aramid ti saan a lisensiado a recruiter.

Adu dagiti nagbalin a biktima iti daytoy nga iskema. Agpayso, maipatulod dagiti trabahador iti sabali a pagilian babaen ti job order ti lisensiado a recruitment agency ngem sabali metten nga employer ti sangladanda. Iti daytoy a sistema, saan a masursurot ti kontrata ken dagiti benepisio a rumbeng a sagrapen dagiti trabahador nangruna iti sueldoda.

Saan a nakaaskasdaaw a makangegtayo iti reklamo manipud iti kailiantayo a nagaplay a kas mekaniko ngem nagtinnag a karpintero. Mabalin a biktimada iti daytoy a sistema iti panagrekrut iti trabahador.

(Adda tuloyna)

Comments are closed.

SALAYSAY: Illegal recruitment: napigsa a panguartaan dagiti manangallilaw (Maikatlo a paset)

Trainee-Worker Scheme.
Continue Reading →

No comments yet.

Leave a Reply

This site uses Akismet to reduce spam. Learn how your comment data is processed.