Footer

Stakeholders ti tabako, sangsangkamaysada iti pannakasalaknib ti industria

CANDON CITY – Sangsangkamaysa dagiti agtuturay, ahensia ken pribado a sektor a nangipatalged a saanda a baybay-an ti industria ti tabako bayat ti panagtitiponda ditoy a siudad idi Nobiembre 20.

Inkari ni House Deputy Speaker Eric singson nga agtultuloy ti adbokasiana iti aniaman a gandat a mangpukaw iti industria ti tabako.

Iti kaudian a pannakiuman ti media kenkuana, kinuna ni Singson a narigat a matay daytoy nga industria iti laksid nga adu dagiti komonkontra.

Awan pay ti uray maysa a pagilian a nangipawil ken nangideklara nga illegal ti panagmula iti tabako wenno agsigarilio, puro pannaka-regulate laeng,” kinuna ti diputado.

Innayon pay ni Singson a napateg a mapagtalinaed ti kalidad dagiti binulong ti tabako ditoy Ilocos Sur tapno makiinnartap kadagiti tabako dagiti sabali a pagilian.

No nangato ti kalidad ti tabakotayo, nalaklaka ti makipatang kadagiti adda iti pribado a sektor tapno ingatoda ti presio a saanen a kasapulan pay ti tripartite meeting,” inlawlawag ni Singson.

Inkari met ni Chris Nelson, managing director ti Philipp Morris Philippines Manufacturing Inc., (PMPMI) maysa kadagiti kadakkelan a kompania ti sigarilio, nga agtultuloy ti panagpuonanda iti pagilian kas suportada kadagiti tobacco farmers iti laksid ti kampania kontra iti panagsigarilio.

Kinuna ni Nelson a maragsakan iti ipakpakita dagiti mannalon a panangsurot kadagiti balakad ken kabaruanan a teknolohia nga isursuroda.

Dakkelen ti improvement iti kalidad ti tabako ditoy Ilocos Region sipud pay sinurot dagiti mannalon dagiti inrusatmi a teknolohia,” impalgak ni Nelson.

Kabayatanna, kinuna ni National Tobacco Administration (NTA) Administrator Carlitos Encarnacion a mangnamnama nga umadu dagiti mannalon ken lumawa pay dagiti talon a mamulaan iti tabako ita a tobacco season agsipud ta malaksid ti napintas a presio (P61/kilo ti floor price ti AA ngem immabot iti P80/kilo ti panaggatang dagiti traders) itay napan a tawen, saan nga apektado dagiti mannalon kadagiti kampania kontra iti panagsigarilio ta ngumatngato latta ti demand iti 2-3% kada tawen.

Ituloy koma dagiti mannalon ti nasapsapa a panagmulada tapno masiguro ti napintas a kalidad ti produktoda,” inyunay-unay ni Encarnacion.#

Comments are closed.