Footer

115 ubbing, nayospital gapu iti food poisoning

MANKAYAN, Benguet – Nasurok a sangagasut nga agbasbasa ti nayospital gapu iti mapapati a pannakasabidongda iti kendi ken dadduma pay a makan a naibuntog iti sirok ti  rangtay iti maysa a barangay ditoy.

Agdagup iti 115 nga agbasbasa iti Palatong Elementary School ti naitaray iti Rural Health Unit ditoy ken iti Lepanto Hospital gapu iti panagsagabada iti sakit ti tian, pannakaulaw ken panagsarua kalpasan ti pannanganda iti kendi, cookies ken chips a nasarakan dagiti pito a mapan agbasa nga ubbing iti sirok ti Tabbac Bridge iti Barangay Sapid ditoy iti agsapa ti Nobiembre 25.

Di pay ammo dagiti autoridad no asino ti nangibuntog kadagiti makan a naikarga iti 11 a sako iti sirok ti rangtay.

Kinuna ni Hepe ti Polis ditoy Fernando Botangen a nangipatuloddan iti sample dagiti nasao a makan para iti panangamiris ti Bureau of Food and Drugs (BFAD) iti rehion.

Kabayatanna, iti emerhensia a miting nga inangay ti konseho ditoy, nangipasada iti resolusion a mangideklara iti ili  iti babaen ti kalamidad.

Kinuna ni Mayor Manalo Galuten a nangilatang ti gobierno munisipal iti P150,000 a maited a tulong kadagiti biktima ken para iti dadduma pay nga emerhensia a kasapulan.

Nangipatulod metten ni Gov. Nestor Fongwan iti nadumaduma nga agas para kadagiti biktima iti pannakasabidong.

Segun iti report, nasarakan dagiti ubbing dagiti naisako a makan iti agsapa ti Nobiembre 27 iti sirok ti rangtay ket pinunnoda dagiti bagda kadagitoy sada inwaras kadagiti kaklaseanda.

Ngem kalpasan ti pannangan dagiti ubbing, nakariknada iti sakit ti tian, pannakaulaw ken panagsarua.#

Comments are closed.