Footer

BANNER NEWS: Tricycle drivers iti Vigan, dida agited iti supli iti plete: reklamo dagiti commuters

VIGAN CITY – Iti baet a P1 laeng ti bimmabaan ti plete ti traysikel ditoy siudad, adu a tricycle driver ti saan nga agsupli no nabukel a P10 ti kuarta ti pasahero.

Daytoy ti kangrunaan a reklamo dagiti commuters, nangnangruna dagiti estudiante a naidanon kadagiti estasion ti radio ken uray iti daytoy a pagiwarnak.

Segun iti maysa a nagannak a dina kayat ti painaganan, saan nga inted ti maysa nga agpaspasada ditoy siudad ti suplina agsipud ta awan kano ti isuplina iti nabukel a P10 a pagpletena.

Nupay kasta, nagkedked ti nagannak a mangibaga iti numero ti traysikel tapno maireport iti autoridad, agsipud ta awan kano pay ti nadamagna a nadusa nga abusado a tricycle driver.

Segun pay iti sabali a pasahero, impetteng ti drayber, awan pay ti pannakaammona a naibaba ti plete ti traysikel iti siudad.

Ngem kinuna ni Vice Mayor Franz Ranches idi indanon kenkuana ni Jun Ramos dagitoy a reklamo dagiti pasahero bayat ti programa ti bise mayor a Ti Konseho ti Vigan nga ireport koma dagiti commuters dagiti traysikelan nga aglablabsing iti paglintegan tapno madusa dagitoy.

Kinuna ti bise mayor nga adda dagiti naiwaras a complaint form, wenno saan idanonda ti reklamoda kadagiti traffic officials wenno iti konseho tapno maipakat ti umisu a pannusa kadagiti naglabsing nga agpaspasada iti traysikel.

Problema ditoy a siudad dagiti abusado a tricycle drivers nga agsingsingir iti nanginngina ngem iti naituding a plete iti baet ti pammasingked dagiti opisial ti gunglo dagiti operators ken tricycle drivers nga ipakatda ti disiplina kadagiti miembro.

Piso laeng ti inaprobaran ti konseho ditoy a rollback iti plete ti traysikel kas maibatay iti rekomendasion ti komite ti transportasion nga idauluan ni Konsehal Everin Molina iti baet ti panangipetteng dagiti commuters a maisubli iti P8.00 ti regular a plete ken P6.00 kadagiti estudiante ken senior citizens agsipud ta daytoy ti plete sakbay ti nagsasaganad a panagpangato ti presio ti lana iti world market.

Iti public hearing nga inangay da Molina, insingasing dagiti tricycle operators a P1 laeng ti bumabaan ti plete agsipud ta nupay bimmaba ti presio ti gasolina, di met simmurot a nagpababa ti presio dagiti spare parts ken dadduma pay a pagbusbosanda.

Kabayatanna, maigidiat iti siudad ti Vigan a P laeng ti nabaelanna a nangibabaan iti plete ti traysikel, P2 ti inaprobaran ti konseho munisipal ti Bantay ken ti Caoayan a rollback ti plete kadagitoy nga ili.

Segun ken ni Konsehal George Leones, chair ti committee on transportation ti konseho ti Bantay, rumbeng laeng a P2 ti bumabaan ti plete ti traysikel agsipud iti nagsasaganad a panagpababa ti presio ti gasolina.

Madama met ti panangtratar dagiti konseho munisipal dagiti nadumaduma nga ili iti probinsia no mano ti rollback ti plete ti traysikel iti lugarda.#

Comments are closed.