Footer

EDITORIAL: Masapul ti naing-inget a panagridam

Nakaam-ames ti naisayangkat a pammapatay iti Siudad ti Mumbai, India a nakatayan ti nasurok a 150 a tattao ken nakadadaelan dagiti sanikua. Indikasion daytoy ti kinadangkok dagiti terorista ken ti saanda a panagpangadua a mangiwaras iti didigra, buteng ken patay tapno maawisda ti imatang ti sangalubongan.

Nasaksianen ti sangalubongan iti napalabas ti kinaranggas dagiti terorista.  Kas iti panangidungparda iti eroplano iti twin towers a nakatayan ti rinibribu a tattao, dagiti panagbomba sadiay Bali, Casablanca, London ken Madrid, dagiti  booby-trapped car bombing ken dagiti di mabilangen a suicide bombing  a mismo a nakakabit iti bagida ti bomba sada pabettaken iti arimutong dagiti tattao.

Kasla saan a maibusan iti taktika dagiti terorista. Kas iti daytoy napasamak iti Taj Mahal Palace and Tower Hotel. Itoy a gundaway, rinaut dagiti terorista ti matatao a lugar nga ayuyang dagiti westerners. Dagiti Kano, British ken Israelis ti immuna a sinapul dagiti terrorista iti hotel sada ginudas. Nagurnongda kadagiti hostage sada  met la pinapatay. Nakita ti lubong nga umis-isemda pay a nangkalbitda iti gatilio dagiti paltogda. Pammaneknek nga awan aniamanna kadakuada ti biag ti tao. Kasla tagiragsakenda la unay ti pannakakitada iti lubong a maipasidong iti ladingit ken sangsangit. Makunami ngarud a kadaksan daytoy nga aramid.

Ti napasamak ket maysa nga indikasion nga awan ti pilpilien dagiti terorista iti panangisaruagda iti kinadangkesda.  Uray ania a lugar, aniaman a nasion, aniaman a puli, aniaman a kinatao, sangsanguenda ti peggad manipud kadagitoy a tattao. No mapasamak kadagiti dadakkel a nasion, sigurado met a mapasamak daytoy kadagiti babassit a pagilian a kas iti Filipinas. Awanen ti pilpilienda, basta adda la ketdi dagiti westerners wenno dagiti umili kadagiti nasion a kangrunaan a mangbusor iti terorismo.

Saan la ketdi a mailaksid ti Filipinas iti kastoy a klase ti atake. Pagaammo ti lubong a destinasion dagiti westerners ti pagilian. Saan a mabalin nga ikkaten ti posibilidad nga iwayatda met ditoy dayta a klase ti kinadangkok.

Ti makadakes, mapapati nga ayuyang dagiti terorista ti Filipinas. Adda pay alegasion nga iti Mindanao ti pakaiwayatan dagiti panagsanayda ken panagplanoda nga agisaruag iti terorismo.

Nasken ngarud ti naing-inget a panagridam dagiti opisial ti militar ken kapolisan.Saan koma a matmaturog iti pansitan ti armada ti pagilian. Saan koma a ti panagbiahe dagiti opisial a mapan tumabuno kadagiti kumperensia ti asikasuenda. Saan koma a ti laeng panagpapuskol iti bulsada ti atupagenda. Naipabaklay iti abagada ti pannakasalaknib ti pagilian iti aniaman a kinadangkok nga itden ti terorismo ken kriminalidad ket daytoy koma ti naipangruna a kitaenda.   

Ti saludsod: manamnama kadi dagiti umili ti pannakasalaknibda kadagiti aramid a kinadangkok?#