Footer

Konsierto, nakaur-or iti P1-M

CANDON CITY – Nasurok a maysa a milion ti naur-or iti konsierto a naangay iti uneg ti simbaan ti St. John de Sahagun ditoy itay Nobiembre 30.

Inawat ni Rev. Fr. Vicente Avila iti gatad manipud kadagiti sponsors iti “Intay Lagipen”, konsierto a nagpaay a pammigbig kadagiti natataengan a kumakanta ken musikero a kasapulan a taginayonen ti baro a henerasion dagiti kumakanta.

Malaksid ken ni Congressman Eric Singson a kangrunaan a tulbek iti pannakaangay ti konsierto, bisita ditoy da Donald Lee, agdama a mangidadaulo ti Taiwan Economic and Cultural Office; Chris Nelson, agdama a managing director ti Philip Morris Philippines, Gov. Deogracias Victor Savellano  ken dadduma pay nga agtuturay.

Ni Minervina Singson, 89-ti tawenna a pianista ken ina ni Congressman Singson ti kangrunaan a nagakem iti konsierto a kaduana dagiti sabali pay a nalaing a pianista a da Blanquita Taqueban, Atty. Richard Carino iti keyboard,  Joy Sababan, violinist ken dadduma pay a nalatak nga agtoktokar.

Pakairamanan kadagiti nagpabuya ti Centennial Choir, SJI Strings, ni Rev. Fr. Divinus Sanctus Rabang, Chef Peter Nic Rodriguez, Dino Chua,  Kristel Singson, Candon City Children’s Choir ken dadduma pay.

Nabara  a sipsipat ti inted dagiti nagbuya iti panagkanta da  dati a Congresswoman Grace Singson iti ‘The Prayer’ a kaduana dagiti tallo a lalaki nga anakna a pakaibilangan da Candon City Mayor Allen Singson, Dr. Ericson Singson ken ni Owen Singson ken iti rendision ni Cong. Singson iti kanta a Con Te Partiro’ a nangipalgak nga adda gayam ilemlemmeng a talento ti kongressman iti panagkantaan.

Libre a nabuya dagiti umili daytoy a konsierto iti uneg iti simbaan.

Maaramat ti naur-or a gatad para iti pannakasimpa ken pannakapapintas ti simbaan, segun ken ni Fr.Avila.#

Comments are closed.