Footer

SALAYSAY: Illegal recruitment: napigsa a panguartaan dagiti manangallilaw (Maikapat a paset)

Visa Assistance wenno Immigration Consultancy Scheme

Masansan a makabasatayo a maipablaak kadagiti aginaldaw a pagiwarnak dagiti anunsio manipud iti maysa a travel consultant wenno consultancy a kaaduanna a ganggannaet a personalidad wenno kailian ngem permanenten nga agnaed iti sabali a pagilian a mangiwarwaragawag iti kaaddada iti Filipinas tapno tulonganda dagiti Filipino nga adda panggepda nga agtrabaho wenno agindeg iti sabali a pagilian kas imigrante a makaala iti bisada iti nadaras a wagas.

Gapu ta mayam-ammo ti nasao a ganggannaet a consultant wenno nangato ti saad daytoy Filipino nga umay ditoy pagilian tapno tumulong kadagiti kakailiantayo mainaig iti nadaras a pannakaalada iti bisada, adu la ketdi ti maawis ken maallukoyda a tumabuno iti angayenda a seminar wenno orientation program iti panggepda a papanan a pagilian.

Kadawyan a ti Estados Unidos, Canada, Ireland ken Switzerland dagiti pagilian a a destinasion dagiti Filipino a tumulongan dagitoy  a consultant tapno nadardarasda a makaala iti bisada iti ipapanda kadagiti nadakamat a pagilian, kas trabahador wenno imigrante, segun iti Philippine Overseas Employment Administration.

Ngem kuna ti POEA a dagitoy nga entidad nga agparparang a kas consultant wenno mangited iti serbisio para iti nadardaras a pannakaala iti bisa ket aktual nga agiwaywayat iti panagrekrut babaen ti panangitanggayada iti trabaho iti ballasiw-taaw babaen ti immigrant visa.

Kinuna pay ti POEA a dagiti orientation seminar nga isaysayangkat dagitoy a consultancy ket aktual nga aktibidad ti panagrekrut.

Kinapudnona, iti baet ti panangibagbaga dagitoy nga immigration consultancy a mangitedda iti serbisio para iti nadaras a pannakala iti bisa, adda met katukadna a gatad a bayadan ti aplikante.

Nupay libre dagiti pormas a nadaras laeng a maala iti internet, a kakuyogda dagiti instructions  tapno nalaka a fill-upan ti aplikante ken pannakaprosesoda, no dumalanen kadagiti consultants, addan bayadan a $1,700 agingga iti $5,000 CDN.

Sabali laeng ti show money ($10,000) a masapul nga ipakitana tapno mamati ti imigrasion iti sangladanna a pagilian a kabaelanna ti mangabaruanan iti dayta a pagilian.

Dakkel daytan a kantidad nga ibaklay ti maysa nga aplikante. No napigsa ti arapaapna a makagteng iti ballasiw-taaw, posible nga isaldana wenno ilakona ti daga, balay wenno kaibatoganna a langit tapno mapaaddana ti kuarta a singiren ti consultancy.

Ngem no patien dagiti consultants, mateggedda ti kantidad a singirenda iti aplikante.

Maibilang a legal daytoy ditoy pagilian. Ngem ti  saan a mailibak, adda dagiti consultancy a manggundaway kadagiti klienteda agingga iti agpadara dagitoy.

Non-visa Country.

Iti babaen daytoy nga iskema, maipatulod dagiti trabahador kadagiti pagilian a saan a kasapulan ti bisa, kas kadagiti kaarrubatayo a pagilian ditoy Abagatan a Daya iti Asia.

Apaman a makadanon ti trabahador iti pagtrabahuanna a pagilian, sa la maited ti bisana tapno makatrabaho a legal iti dayta a pagilian.

Yan ti rigatna iti daytoy, masansan a magundawayan ti trabahador. Saanna a mapili ti trabaho a serkanna iti daytoy nga iskema. Posible a naallukoy iti natagapulotan a balikas ti recruiter nga agur-uray ti  dakkel a sueldona kas clerk wenno dianitor iti bangko wenno iti opisina iti dayta a pagilian ngem idi dimtengen  sadiay,  mekaniko wenno karpintero metten ti nagtinnaganna.

          (Maigibusto)

Comments are closed.