Footer

EDITORIAL: Kalpasan ti isasang-at iti tapaw, sumaruno ti panagsalog

Naminsan pay a napaneknekan iti panagboksing da Oscar De la Hoya ken ni Manny Pacquiao itay Disiembre 7 iti Las Vegas ti kinapudno a no nakagtengkan iti tapaw awanen ti sabali a direksionmo no di ti agsalog.

Impetteng dagiti autoridad iti boksing a maysa  mismatch ti De la Hoya-Pacquiao dream match, pabor iti Mexican-American a boksingero.

Adda pamkuatanda nga agsao iti dayta: umuna, adayo a nataytayag ni de la Hoya ngem ni Pacquiao; maikadua, adayo nga at-atiddog ti gaw-atna, maikatlo, saan nga asi-asi a boksingero ta nagkampeon iti innem a dibision.

Ti dakkel a baet ti tawenda ti pangatiwan kenkuana ni Pacquiao. Agtawen laeng ni Pacquiao iti 29 (selebraranna ti maika-30 a tawenno inton Dis. 17) idinto a 35 ken ni De la Hoya. No madanon ti maysa a boksingero ti kastoy nga edad,  bumaban ti resistensiana, kumapsut ti tumeng ken bumuntog ti reflexesna.

Iti sabali a bangir, kapigpigsaan ni Pacquiao, napardas ti garawna ken nadagsen ti gemgemna gapuna nga isu ti umuna nga Asiano a nakaragpat iti  kampeonato iti uppat a dibision ti boksing.

Idi agrupaken dagiti dua a boksingero iti ring, pinaneknekan  ti Filipino no apay a nakoronaan a  best pound for pound boxer iti lubong ket nakita ti sangalubongan ti siglat ken pardasna a nangmanso iti maysa a boxer a maibilang a maysa kadagiti tangtangaden ken resrespetaren iti uneg iti ring.

Nakaro unay ti sinagrap ni De la Hoya a disnog ket inkeddengna ken dagiti trainersna nga isukoda ti rupak tapno mataginayonna ti reputasionna ken saan a mabuya ti sangalubongan ti pannakadalupona iti ima ti Filipino a boksingero.

Galante nga inako ni De la Hoya ti pannakaabakna: “naabakak iti nalalaing ngem siak a boksingero.”

Idi madamag no ania ti planona iti masakbayan,  insungbat ni De la Hoya: “Kayat pay ti pusok ti makirupak, sigurado dayta…. ngem no saan nga agresponde ti pisikal, ania ti maaramidmo?”

Makunami met: naikur-iten ni De la Hoya ti naganna iti rueda ti boksing, panawenen tapno ibitinna ti glovena ket asikasuennan nga ipamaysa dagiti negosiona ken ipaaynan ti imatangna iti pamiliana.

Umanamongkami iti imbalikas ni Freddie Roach, ti nangmuli ken ni Pacquiao tapno agbalin a complete boxer: “Mangnamnamaak nga adda umdas a panunot ni De la Hoya tapno agsardengen a makiboksing. Ammok a dina kayat ti rummuar (iti ring) a kastoy ngem no saan a rummuar, mabalin a nadakdakes ti mapasamak kenkuana.”

Kabayatanna, nakagteng metten ni Pacquiao iti tapaw a dagiti laeng kalalaingan a boksingero a kas kenkuana ti makadanon.

Iti daytoy a kapigpigsaanna, mabalin nga agtalinaed iti tapaw iti sumagmamano pay a tawen. Kalpasanna, agsalogto metten.

Urayen kadi met ti Pambansang Kamao a mapasamak kenkuana ti napasamak ken ni De la Hoya ken dagiti immun-una a boksingero a naparaburan a makagteng iti tapaw ti balligi?

Comments are closed.