Footer

ITI INDAYON NI LAGIP: Lagip iti Paskua (Umuna iti Dua a Paset)

Nakapagsuratak kenka ta kayatko met nga ibinglay ti maysa a paset ti biagko.

Siak ni Adela, agtawen iti 35, agnaed iti maysa a barangay iti Narvacan, Ilocos Sur. Diakon dakamaten ti barangaymi, Manong Danny, tapno mailingedko ti kinasiasinok.

Agtawenak iti duapulo idi agkallaysakami ken ni Nicanor, Manong Danny. Simple laeng ti kasarmi ngem mapnekakon ta ti importante, ipatpategko ni Kanor ken ammok nga ay-ayatennak met.

Marigrigat laeng ti panagbiagmi, Manong Danny.  Sekundaria laeng ti nagpatinggaan ni Kanor ket awan ti masnop a trabahona. Makitraytraysikel laeng iti kaarrubami.

Idi katiptiponmi, umdas ti masapulanna para kadakami.Adda met bassit a maurnongmi. Ngem idi agsasarunon dagiti annakmi, mariknamin a makurkurangankami.

Napanunot ni Kanor ti mangala iti bukodna a traysikel.  Adda met naidulinko ket isu ti inaramatmi a down payment iti motorsiklo.

Nasapa a mapan agpasada ni Kanor aglalo no panagbabasa. Nagbalin a sukina dagiti annak dagiti kalugaranmi nga agbasbasa iti kabesera. Masapa nga itulodna ida iti pagadalan iti bigat. Kalpasanna, agrota iti uneg ti ili agingga iti malem a panangiyawidna kadagiti estudiante a kalugaranmi.

Gapu iti gaget ken anep ni lakay, saan a nagbalin a parikut ti tallo a tawen a panangtinnagmi iti motormi agingga a naipaima kadakami ti papeles.

Ngem no dadduma, dillawek ni lakay ta masobraanna ti agpasada. Saan laengen nga iti aldaw no di pay iti rabii. Masansan a parbangonen no sumangpet iti balay. Nariwet pay laeng, addan a mangpapaandar iti luganna.

“Ad-adu ti mapasadaan ti rabii, baket,  ta kaadduanna ti arkila,” kinunana idi palagipak.   “Di pay masapul makipilaak ta bassitkami nga agpaspasada iti rabii.”

“Wen, a, ngem dayta salun-atmo ti pakadanagak,” nakunak. “Uray makina, maperdi no saan nga agsardeng ti panagobrana. Inanaam met ta bagim. Uray ket umanay met ti mapasadaam iti aldaw.”

“Kasapulanta ti agurnong, baket, ket ne, dumakkelen dagiti ubbing. Kayatko a makaadalda tapno saanda a maipada a kas kadata.”

Adda pamkuatan ni lakay nga agsalukag, Manong Danny. Ni Andy nga inunaanmi,  addan iti maikatlo a kadsaaran iti high school.  First year metten ni Alynna a maikadua.  Addada metten iti maikalima ken maikatlo a grado iti elementaria da Mark ken Aileen.

Ngem no dadduma, mabusorak ken ni lakay. Uray matutudo, mapan latta agpasada. Agmalmalem a makutoran aglalo no napigsa ti tudo ken naangin.

Maysa nga aldaw, simmangpet ni Kanor a nasapa. Nagderetso iti kuartomi.

Idi immunegak, nadatngak a nakaidda.

“Adda marikriknam?” inamadko.

“Kasla agkakapsutak,” insungbatna.

“Ay,  no inka koma agpa-check-upka dita rural health center?” natarantaak.

“Ania ket ni Adelan, nabisinanak laeng siguro ta nalipatak metten ti nangaldaw.”

“Kanor, maymayat  siguro nga inka agpatsek-ap.”

Timmakder ketdi ni Kanor. “Awanen ti kapsutko. Innakon agpasada ket sumrek manen dagiti ubbing,” nakunana.

Saan metten a naulit daydi. Intuloy ni Kanor ti agpasada iti agmalem ken iti rabii. Katawaannak laeng no kasdiay a palagipak.

“Dika madanagan, saan a kapten ti sakit ni lakaymo,” sangkasutilna kaniak.

Ngem maysa a rabii, nakariingak idi adda agapo iti paraangan. Linukipko ti tawa. Ni Marcos, adayon a kabagianmi. Agpaspasada met iti traysikel.

“Apay kadi, Marcos?” sinaludsodko nupay adda mabukbukel a dakes a riknak.

“Kua ngamin, Manang… ni Manong Kanor, intaraymi iti ospital!”

          (Maigibusto)

Comments are closed.