Footer

Pannakatiliw 3 a nangato nga opisial ti NPA, indikasion a napakapsuten dagiti grupo a komunista: PNP

Kinuna ni PNP Chief Director General Jesus A.  Verzosa nga iti pannakatiliw dagiti tallo a turayen ti New People’s Army ken iti isusuko dagiti sabali pay a rebelde, maysa nga indikasion a naipababan  ti polis ken ti militar ti pigsa ken bilang dagiti grupo a komunista.

Imbatad daytoy ni Verzosa kalpasan a naidatag kenkuana iti Camp Crame Edgar Molina alias “Ka Dong/Bobby”, Edwin Balaoag, alias “Ka Bagyan” ken Rosemarie Domingo, alias “Ka Ramses”.

Mismo a ni Police Chief Supt. Luizo Ticman, regional director ti Region I, ti nangidatag kadagiti tallo ken ni Verzosa iti Camp Crame.

Inaresto ti nagtipon a bunggoy ti PRO1 Regional Intelligence Division, Ilocos Sur Police Provincial Office ken ti 103rd Ilocos Sur Provincial Mobile Group iti babaen ti overall command ni Police Supt. Ricardo B. Dayag, Jr. dagiti tallo iti Barangay Buneng, Lacub, Abra itay Disiembre 1.

Segun ken ni Verzosa, ni Molina ti commanding officer ti Kilusang Larangang Gerilya-Northern Luzon Command  nga agdakdakiwas iti Abra ken Ilocos Sur ken sekretario ti NPA-Abra Chapter.

Maysa ni Molina kadagiti nakalista iti Department of Interior and Local Government a most wanted ket addaan iti P1 milion a gunggona para iti pannakatiliwna.

Karaman met da Balaoag , executive officer ken Domingo, medical officer, kadagiti aganay sangagasut a rebelde a sumangsango iti pannakaaresto kas maibatay iti warrant of arrest nga inyisio ti Abra Regional Trial Court idi 2007 gapu iti kasoda a murder ken multiple frustrated murder.

Segun ken ni Verzosa, mapattapatta nga aganay a 5,000 ti bilang dagiti komunista a gerilia manipud iti 25,000 idi qapagtapog ti 1980s.

Kabayatanna, kinuna ti gobierno a nakalukat iti pannakaipasdek iti ceasefire kadagiti rebelde a komunista bayat ti Paskua nupay awan pay ti rekomendasion manipud iti DILG, ti militar ken polis.

Pinadas dagiti peace negotiators a biagen ti naisardeng a patangan ti kappia ngem saanda a nagkasurotan iti mekanismo ti ceasefire iti masungad a Paskua.#