Footer

SALAYSAY: DZTP Outreach Program, sinerbianna dagiti agnaed iti nasulinek a lugar

Kas paset ti pannakadanon ti DZTP Radio Tirad Pass iti maikasangapulo ket uppat a tawenna a mangipapaay iti serbisio kadagiti umili iti probinsia ti Ilocos Sur, La Union, Benguet, paset ti Pangasinan, Kalinga ken dadduma pay a madanon ti signalna, naplano manen babaen ti panangidaulo ni Station Manager Arlon Serdenia iti programa a mangipaay iti tulong ken nasapa a pamaskua kadagiti narigat ti panagbiagna a kakailian a masarakan iti nasulinek a barangay nga awanan iti koriente ken narigat a danonen ti lugan.

Naisayangkaten daytoy a programa itay napalabas a tawen idiay Sitio Kinbilibil, Barangay Daligan, Santa Cruz, Ilocos Sur.  Kinasapulan dagiti nakipagmaymaysa iti daytoy a programa ti nagna iti agarup uppat nga oras iti umuli-a-sumalog a bantay tapno laeng madanonda daytoy nasulinek a lugar agsipud ta awan ti makalasat ti lugan.

Napagnunummuan nga iti daytoy a tawen, dagiti residente iti sitio Cangao, barangay Tiagan, San Emilio, Ilocos Sur ti benepisario iti outreach program.  Nupay as-asideg no maiyarig iti Kinbilibil, narigat ti panagbiag dagiti agnaed ditoy ket kasapulanda ti tulong.

Kinapudnona, gapu iti kinaadayona iti ili, nagbalin a biktima dagiti bumarangay iti sakit a cholera.  Maysa ti natay ken nasurok innem a pulo nga agindeg iti daytoy a sitio ti nayospital gapu iti panagraira ti cholera.

Napili ti sitio Cangao a pakaisayangkatan iti outreach program kas rekomendasion dagiti kameng ti Philippine Army, 50th Infantry Battalion a nakabase iti San Juan, Ilocos Sur.  Ni S/Sgt. Marcelo Garcia, host iti Oras iti Soldado iti DZTP, ti nangirekomenda iti nasao a lugar.  Isuda met laengen ti nakikoordinar iti lokal a gobierno ti San Emilio nga idadauluan ni Mayor Lorenzo Bragado.

Tulong manipud kadagiti agdengdengngeg

Madakamat ditoy a saan a maipatungpal ti programa no di babaen ti aglaplapusanan a suporta dagiti umili nangruna dagiti agdengdengngeg iti DZTP Radio Tirad Pass.  Dagiti agdengdengngeg met laeng iti daytoy nga estasion ti radio ti nangsuporta iti outreach program a naisayangkat itay napalabas a tawen.

Babaen ti panawagan ti DZTP, nagidonar dagiti naayat a dumdumngeg kadagiti used clothes, sapatos, ay-ayam, ken dadduma pay a mabalin nga itulong kadagiti agnaed iti Cangao.

Nagidonar pay dagiti agba-basa iti Cabanela Early Learning Center kadagiti didan ar-aramaten a lupotda, sapatos, ay-ayam ken dadduma pay.  Anian a ragsak ni Madam Effy Cabanela, mangimatmaton iti nasao a pagadalan, iti aglaplapusanan a panagresponde dagiti nagannak ken agad-adal iti daytoy a programa a mang-tulong kadagiti agnaed iti Cangao.

Dandani napunno ti news-room ti DZTP idi maurnong dagiti donasion. Adu pay dagiti kabarbaro nga aruaten, dagiti dadduma, nadalus ken kallaba nga indonar dagiti agdengdengngeg.

       (Adda tuloyna)

Comments are closed.