Footer

SALAYSAY: Illegal recruitment: napigsa a panguartaan dagiti manangallilaw (Maudi a paset)

Camouflaged participants, representatives iti seminars/sports events.

Iti babaen daytoy nga iskema, pagparangen ti illegal nga agrekrut iti trabahador nga adda seminar wenno dakkel a pagteng, kas koma iti paay-ayam iti sports,  kumperensia, konsierto wenno taripnong nga angayen ti maysa a dakkel a gunglo a pangawisanna kadagiti partisipante ngem kinapudnona, mapanda agtrabaho iti nadakamat a pagilian.

Kas iti naidiario sumagmamano a tawenen ti napalabas a saan a panangipalubos ti imigrasion ti maysa a pagilian iti Europa dagiti agtutubo a Filipino a mapan tumabuno iti internasional a taripnong a maangay iti pagilianda. Nagriri dagiti opisial dagiti gunglo ditoy ngem saan a nagkir-in dagiti agtuturay iti ganggannaet a pagilian iti nagtakderanna.

Nagramut ngamin daytoy iti pammaliiw nga adu nga agtutubo a partisipante manipud ditoy pagiliantayo ti kellaat a nagpukaw ken saanen a mabirokan pay kalpasan ti pannakaangay ti taripnong. Dakkel ti suspetsa ti imigrasion nga inaramat laeng dagiti nakipartisipar a gundaway ti kaadda ti taripnong tapno makapanda iti sabali a pagilian Pattapattaen dagiti agtuturay a kangrunaan a panggep dagiti nagpukaw ti panagsapulda iti trabaho.

Iti daytoy nga iskema, saan a nakakaskasdaaw a maabuso ti kalintegan ti trabahador agsipud ta nakastrek iti sabali a pagilian nga agtrabaho iti saan a maikanatad a wagas. Iti nalawlawag a pannao, maysa nga illegal alien.

Au Pair

Kaing-ingas daytoy ti camouflaged participant/representative iti seminar/taripnong. Iti daytoy nga iskema, pagparangen ti recruitment agency nga adda pamilia a mangesponsor iti maysa nga inter-cultural a programa ket mapan ti maysa a partisipante nga agbasa iti language and culture iti naituding a tiempo.

Ngem ti kinapudnona, mapan agtrabaho ti nasao a partisipante  kas katulong ket maikkan laeng iti alawans iti binulan kas sukat ti panaggianna iti pagtaengan iti balay ti esponsor kuno.

Kaadduan a pagsangladan dagitoy a biktima iti pagilian nga Italia.

Referral system

Iwaywayat daytoy dagiti illegal recruiters a pangawis iti trabahador a mapan agtrabaho iti pagilian iti Abagatan a Daya ti Asia, kangrunaanna iti Taiwan. Pagwarasen ti recruitment agency dagiti “ahenteda” a mamalaybalay kadagiti lugar nga asideg iti baybay nga agala iti trabahador kas mangngalap. Pagparangen dagitoy nga “ahente” nga inrekomenda dagiti dati a narekrut a kakailian dagiti kayatda nga allukoyen nga agtrabaho.

Mail-Order Bride

 Uray ita, nalatak daytoy a wagas a pangbalballaibo kadagiti kailian. Babaen ti panangipamuspusan dagiti brokers, agassawa ti maysa a Filipina ken maysa a foreigner. Ngem saan nga asawa ti pagsaltekan ti biktima no di agbalin a katulong ti asawana wenno ti pamilia daytoy. Ti makadakes unay no mailako ti biktima nga adipen, agbalin a paupaan ken dadduma pay a pannakaabuso a seksual.  

Kaaduanna dagiti mabikbiktima a mayasawa iti Koreano wenno Hapon, segun ti Philippine Overseas Employment Administration.#

Comments are closed.