Footer

BANNER NEWS: 5 barangay captains, kayatda ti gumatang iti paltog kas proteksionda

SAN ESTEBAN, Ilocos Sur – Adda pangta iti biag dagiti kapitan ti barangay ditoy nga ili ta prioridadda ti maaddaan iti paltog a pakaaramatan iti pondo ti barangay?

Simngay daytoy a saludsod kalpasan a lima a barangay captains ti nangiyalokar iti pondo para iti pannakagatang iti “military and police equipment” para iti hurisdiksionda a barangay.

Kalpasan nga inaprobaran ti konseho ditoy ti supplementary budget ti sangapulo a barangay, napagtitinongan dagiti kapitan ti barangay iti Poblasion, San Pablo, Apatot, San Nicolas ken Bateria ti panangilatangda iti pundo para iti pannakagatang iti paltog kas proteksionda iti panangannongda iti pagrebbenganda.

Segun ken ni ABC President Archie Elaydo, napanunotan dagiti dadaulo nga opisial dagiti nadakamat a lima a barangay ti igagatangda iti paltog kas proteksionda gapu ta addan dagiti report a napapatay a barangay captain kadagiti dadduma a paset ti pagilian.

Mapapati a napagnunummuan dagiti nasao a barangay officials a gumatangda amin iti 9mm a paltog a mapattapatta nga agpateg iti P20,000 tunggal maysa.

Inkalintegan dagiti kapitan a nupay awan pay ti kaso a napapatay a barangay captain iti ilida, saandan nga iyuray nga adda mapasamak sakbay a gumatangda iti pangproteksionda iti biagda.

Nupay kasta, saan a kinayat dagiti barangay captains dagiti sabali pay a lima a barangay a pakairamanan ti Villa Quirino, Cappacappa, Ansad, San Rafael ken Cabaroan a paltog ti pakaipanan ti pondo ti barangayda.

Kinuna ti maysa a kapitan ti barangay a saan a nasisita a gumatangda iti paltog agsipud ta adu dagiti sabali a prioridadda a proyekto ti barangayda.

Napagnunummuanan dagiti barangay captains a mapalubosanda laeng a mangiruar iti paltog iti sakupda a barangay ken iti tiempo a panagrondada.#

Comments are closed.