Footer

INDAYON NI LAGIP: Lagip iti Paskua (Maudi a paset)

“Ania ti napasamak ken ni Kanor, Marcos?” nakunak ngem mangrugin nga agkakapsut ti tumengko.

“Kellaat lattan a nakusbo, Manang. Impanmi iti Lapira Hospital.”

Riniingko ni Andy ket binilinko a kitaenna dagiti kakabsatna. Nangipisokak iti tisiert ni lakay iti plastik a bag.

Naammuak nga adda koma agpaitulod a pasahero ken ni lakay. Ngem idi tumakder, kellaat lattan a natuang. Idi arayaten da Marcos, imbagana nga itarayda iti ospital ta agkakapsut kano.

Adda naikabit a suero ken ni lakay idi umunegak iti kuarto a nakaipananna. Iti dayta a darikmat, nakagatko ti bibigko, Manong Danny. Iti panangdayas kenkuana ti lawag manipud iti flourescent lamp, nakabesbessag ni lakay. Kasla adu ti limmakayanna.

Idi madlawnak, nagmulagat. Pinilitna ti immisem. Nagtugawak iti sikiganna. Sinapul ti imana ti dakulapko sana pinetpetan.

Diak nasarkedan ti luak, Manong Danny. Iti panagriknak, kasla maysa a nakutoran a piek ni lakay, agbirbirok iti pudot a pagkamanganna.

“Kumusta ti panagriknam?” sinaludsodko. 

“Nasayaat metten,” insungbatna.

“Lakay, idi pay laeng nga ibagbagak kenka a kitaem ti bagim, ania ngay itan.”

“Ala, huston.  Inton bigat, rummuarakto met laengen.”

Ngem kabigatanna, saan a pinalubosan ti doktor ni lakay.  Paliiwenda kano pay.  Agkedked koma ni  lakay ngem imbagak a masapul nga aginana pay ta nakapsut pay laeng.

Iti maikatlo nga aldawmi iti ospital, pinaayabannak ti doktor.

“Nakaron ti sakit ni lakay, Mrs. ket nataninganen ti panagbiagna!”

Naklaatak iti dayta nga impakaammo ti doktor, Manong Danny. Kasla nagtupak kaniak ti lubong. Ni Kanor, addan taning ti biagna?

Inkeddengko nga iyawid ni lakay iti balay. Nasaysayaat nga iti balay ti pangpalabsanna iti nabatbati pay nga aldaw ditoy lubong.

Awan ti nangipalgakak iti sakit ni lakay, Manong Danny. Uray dagiti annakko, saanda nga ammo a dandanin pumanaw iti sidongda ti amada.

Sangkapapilit ni Kanor ti ipapanna panagpasada ngem imbagak nga aginana pay ta dayta ti bilin ti doktor.

“Kasanon ti panagbiagtayo no diak agpasada?” nakunana iti naminsan.

“Agangkatak iti nateng a mapanko ilako iti tiendaan iti ili,” nakunak.

Pinilitko a pinaragsak ti langak no kasdiay a kadennak ni lakay ken dagiti annakmi, Manong Danny. Ngem iti rabii, no nakaturogdan, pamrayak ti mapan iti kadaklan ket iti abay ti tawa, siulimek a sangitak ti kasasaadmi.

Maysa a rabii, diak nadlaw a rimmuar ni Kanor. Madamaak nga agsansanto rosario iti sanguanan ti bassit nga altar. Inurayna a malpasak.

“Baket,  diak kayat nga agladingitkayo no pumusayak. Narigat kaniak, ta panawankayonton, dikayonton maaywanan, maisapulan kadagiti kasapulanyo ditoy balay.    Ngem ammok a dimonto baybay-an dagiti annakta…”

Nagtung-edak, Manong Danny. Uray saankon nga ibalikas, ammon ni Kanor nga asidegen ti isisinana iti sidongmi.

Adda dagiti darikmat a seknannak ti isusuko. Ngem no sumangbay dayta a rikna, pamrayak ti agparintumeng iti bassit nga altar ken agkararag iti Naindaklan nga Ina tapno ikkannak iti pigsak a mangibaklay kadagiti problemami a sangapamilia.

Wen, Manong Danny, pinabilegko ti bagik tapno di makita ti asawak ken dagiti annakko nga umas-assibay ti isusukok iti daytoy nadagsen a pannubok iti biagmi.

Nakunak iti bagik: ipaayko ken ni Kanor amin a pagragsakanna iti nabatbati pay a panawen iti biagna, iti panawen a kasapulanna ti ayat ken pammateg a dakami laeng nga aginana ti makaited.

Tengnga ti rabii ti Disiembre 24 idi magsatan ti anges ni Kanor, Manong Danny. Pannakayanak ti Mesias! Isasangbay ti Ari ti Ayat.

Ngem pimmusay ni lakay a nasimbeng ti panunotna.Pimmusay nga addakami iti sibayna. Pimmusay nga ammona a saanko a baybay-an dagiti annakkmi. Pimmusay nga ammona nga agingga iti maudi a kanitona ditoy lubong, ipatpategmi.

Asideg manen ti Paskua, Manong Danny. Maipalagip manen kaniak nga iti maysa a paset ti biagko, adda maysa a Kanor a gapu iti panangipategna kadakami, inyaradona ti bagina iti trabaho tapno agnam-aykami.

Wen, naaklonmin nga awanen iti sidongmi. Nupay adda dumuko a saem no dadduma, inawatmi a maysa a pannubok ti ipupusayna a mangted kadakami iti dakdakkel a pigsa ken kired iti pannakidangadangmi iti biag.#

Comments are closed.