Footer

Pannakaisublida nga ili: 16 kabarbaro a siudad, nagapela iti Korte Suprema

MANILA – Nangipila  dagiti 16 a kabarbaro a siudad a pakairamanan ti maysa ditoy Ilocos iti nagtitipon a mosion para iti rekonsiderasion ti Korte Suprema iti pangngeddengna a nangideklara a saan a konstitusional dagiti linteg a namagbalin kadakuada a siudad.

Naammuan a kinonsolidar ti law firm ni dati a Solicitor General Estelito Mendoza dagiti insagana dagiti abogado dagiti siudad a nagsisina nga apela a nangikararaganda iti Korte Suprema a baliktaden ken iwalin daytoy ti agdama a desisionna ken ideklarana a konstitusional dagiti linteg ti cityhood kalpasan a kitaenna dagiti facts ken iti naan-anay a deliberasion.

Malaksid iti Batac City iti Ilocos Norte, naapektaran iti desision ti Korte Suprema dagiti 15 pay a kabarbaro a siudad a pakairamanan ti Baybay City, Leyte; ti siudad ti Bogo, Carcar, ken Naga nga adda amin iti Cebu; Catbalogan City, Samar; Tandag City, Surigao del Sur; Borongan City, Eastern Samar; Tayabas City, Quezon; Lamitan City, Basilan; Bayugan City, Agusan del Sur; Tabuk City,  Kalinga; El Salvador City,   Misamis Oriental; Mati City, Davao Oriental; Guilhulngan City, Negros Oriental; ken Cabadbaran City, Agusan del Norte.

Iti pangngeddeng ti Korte Suprema, kinunana a sinalungasing ti cityhood laws ti Section 10 ti Article X ti Konstitusion nga “awan ti probinsia, siudad, munisipalidad wenno barangay a mabuangay, mabingay, mapagtipon, mapukaw wenno mabalbaliwan a nakaro ti pagbeddenganna, malaksid no maiyannatup iti pagbatayan a naipasdek iti Local Government Code ken adda iti pananganamong iti majority a butos iti maysa a plebisito iti political units a direkta a maapektaran.”

Kinuna pay ti Korte Suprema a napaay ti cityhood laws a nagtungpal iti probiso ti Section 450 ti Local Government Code kas inamendaran ti R.A. 9009.

Kinuna pay ti Korte Suprema nga awan ti inlanad ti R.A. 9009 a mailaksid iti naingato nga income requirement, uray kadagiti 16 a respondent a munisipalidad.

Sagudayen ti R.A. 9009 ti annual requirement dagiti ili nga agbalin a siudad  manipud iti P20 milion iti P100 milion, exclusive iti internal revenue allotment.

Iti butos a 6-5, winaswas ti Korte Suprema ti konbersion dagiti 16 a munisipalidad babaen ti panangpaborna iti petision ti League of Cities of the Philippines a pannakaideklara a saan a konstitusional ti 16 cityhood laws.

Segun iti LCP, nabuangay dagiti 16 a siudad iti baet a dida nagun-od ti minimum nga income requirements para siudad.

Nagbutos a pabor iti desision da Chief Justice Reynato Puno ken Associate Justices Leonardo Quisumbing, Alicia Austria-Martinez, Conchita Carpio Morales, Presbiterio Velasco Jr. kenArturo Biron.

Kimmontra da Associate Justices Ruben Reyes, Renato Corona, Adolfo Azcuna, Minita Chico-Nazario ken Teresita Leonardo-De Castro.

Iti ikokontra ni Reyes iti desision, kinunana nga tinungpal laeng ti cityhood laws ti intension ti R.A. 9009 ket maiyannurot ngarud kadagiti pagbatayan nga intuding ti Local Government Code kas maibatay iti Section 10 iti Article X ti Konstitusion.

Iti pangngeddeng ti Korte Suprema a pannakaisubli dagiti 16 a kabarbaro a siudad nga ili, nagbalin laengen a 120 ti bilang dagiti siudad iti sapasap a pagilian.#

Comments are closed.