Footer

SALAYSAY: Dagiti Mapukpukaw a Kannawidan-Paskua (Umuna a paset)

Mapukpukaw ti POSADA ken NIÑO JESUS VISITACION a tradision ti Kailokuan ken kas paset ti selebrasion ti paskua. Napateg dagitoy a tradision ta degdeganna ti pammati nga agayat ken agserbi.

Mapukpukaw ti termino nga inaramatko. Kayatna a sawen, adda pay laeng posibilidad a sibibiag dagitoy kadagiti lugar a saanko a naadakan wenno saanko a kabisado ti kustumbreda iti panangselebrarda iti Paskua. Nalabit nga adda, nalabit nga awanen.

Mapukpukaw. Posible a naisardeng wenno insardengen. Naginanan. Naturog. Posible nga awan ti mangannong wenno mangaramid kadagitoy. Posible pay ti kinaawan ti interes dagiti maseknan a mangipatungpal wenno mangannong kadagitoy. No adda  makunkuna  nga interes, saan a masasaan nga adda latta   tumaud a mangannong ken mangipatungpal kadagitoy. Dayta interes ti manginaw ken mangipasngay kadagiti mangannong. Matay ti maysa a banag wenno selebrasion iti kinaawan ti interes dagiti maseknan. Isu  nga adda  dagiti aginana a tradision.

 Posible met a ginaburanen dagitoy a tradision iti komersialisasion iti panangselebrar ti Paskua. Nadangkok la  unay ti komersialisasion iti Paskua. Pukawenna ti anag wenno kaipapanan dagiti napapateg nga ispiritual a bambanag. Pinagbalinna a materialistiko ti tao a nangin-inut a nangpukaw kadagitoy a napapateg a tradision ti Paskua. Posible met daytoy.

Maysa pay a nakagapu iti panagpukaw dagitoy a tradision ti gubat. Ta ania a rason? Nalabit a natay iti gubat dagiti kangrunaan a mangipatpatungpal wenno kangrunaan nga impormante kadagitoy a tradision ket napukaw dagiti sources wenno taudan ti impormasion no kasano  nga  ipatungpal ken aramiden dagitoy dua a tradision.

Kas iti nasukisoktayo, maar-aramid, kapades iti panangaramid ni Ilokano iti Posada ken Niño Jesus Visitacion idi sakbay ti  Maikadua a Gubat Sangalubongan.

Iti panangbatokko iti dan-aw ti lagip ti napalabas, ubbaw ti maiyaonko a nasaksiak dagitoy. Awan a talaga ti malagipko.Naipasngay datao iti nasurok a maysa a dekada kalpasan dayta a gubat isu a maibilangak kadagiti napukawan.

Nupay kasta, iti kinamanagbasabasatayo ken iti panagsuksukisoktayo kadagiti posible a suraten, nasagangtayo dagitoy POSADA ken NIÑO JESUS VISITACION. 

Ti Niño Jesus Visitacion.

Tradision nga insangpet dagiti Kastila. Dagiti Kastila a nangiyeg iti Kristianismo ditoy pagilian. Isuda ngarud iti timmawidan wenno nangallatiwan kadagitoy a tradision.

Ti Niño Jesus Visitacion ket panangipasiar iti estatua ni ubing a Jesus (Niño Jesus) kadagiti kabalbalayan. Adda pay kakuyogna a banda-musiko.

Kas iti insurat da Reynaldo Alejandro ken Maria Chorengel iti libroda a Pasko: The Philippine Christmas ken impablaak ti National Bookstore, Inc. and Anvil Publishing, Inc., 1998, direkta nga intudoda a tradision ni Ilokano daytoy wenno dagiti probinsia iti Amianan a Luzon.

Idi ubbingkami, wen, adda maysa a lakay a mangipaspasiar iti estatua ni Niño Jesus. Naisem ken naparagsit a lakay. No kasta a sumungaden daytoy a lakay, agiinnunakamin a mapan umagep iti estatua ni Niño Jesus. Bendisionannakamin ti lakay nga umis-isem wenno saan, iggamanna ti tuktok ti tunggal maysa nga agkatkatawa. Santo pumanaw a siraragsak. Kasta laeng.

(Adda tuloyna)

Comments are closed.