Footer

EDITORIAL: Pannakainbolbar ti kangrunaan

Adda
panangipagarup a nataltalged ti kasasaad dagiti provincial
journalists ngem dagiti Manila-based a kapatadanda. Ngem iti maysa a
seminar nga inangay ti National Union of Journalists of the
Philippines (NUJP) for Northern Luzon-based journalists, limtuad nga
agpadpada ti problema dagitoy.






Uray iti siudad, adu dagiti agiwarwarnak nga
agtrabtrabaho iti nalablabes ngem iti oras a rumbeng a panagtrabahoda
ngem nababa met ti sueldoda. Overworked na, underpaid pa.

Madakamat pay ditoy a nakurang ti seguridadda iti
trabahoda. No adda bassit a nagkibaltangan wenno nagkurangan ti maysa
nga agiwarwarnak iti panagireport wenno panangannongna iti
pagrebbenganna, saan a mainsasaan a masuspenso nga awan ti sueldona
wenno pakaikkatanna pay, depende iti kinagrabe ti ‘nagbasolanna’.
Mainayon pay ditoy nga adu nga agiwarwarnak ti maibilang laeng a
casual wenno contractual. No kastoy ti pakaibilangam, natural nga
awan dagiti regular a benepisio a maipaay kenka.

Makadakes, adda dagiti dakkel a paggidiatan iti sueldo
dagiti agiwarwarnak. Adda dagiti maibilang nga ‘stringers’ ken
‘reporters’. Kapaliiwan a dakdakkel ti sueldo ti umuna ngem iti
maikadua. No apay, adda daytan kadagiti diosen ti warnakan.

Ngem iti baet dagitoy a takuat, segun iti maysa a
surbey, dagiti agiwarwarnak ditoy pagilian ti maysa kadagiti
kapeggadan a pagtrabahuan ti maysa a periodista. Naibatay daytoy a
waragawag kadagiti adu nga insidente ti pannakapapatay ken panagpukaw
dagiti agiwarwarnak ditoy pagilian a kaaduanna ti awan ti
nagbanaganna.

Ti makadakes, dagiti politiko wenno nabibileg a tattao
a nabaddekan ti sakada gapu kadagiti pablaak dagiti agiwarwarnak nga
anomalia wenno panagkunniber a nakaisangkotanda ti mapapati nga adda
iti likudan dagitoy a pammapatay wenno panagpukaw. Ipetpetteng
dagitoy nga awan ti ammoda kadagitoy a pammapatay ken panagpukaw
dagiti agiwarwarnak, ngem kastay kunada, magasangan ti agsida iti
sili.

Insingasing ti NUJP a kasapulan a maadalan dagiti kameng
ti media no kasano a makapagtitipkelda ken makabuangayda iti
gungloda a mangitag-ay iti pagimbaganda.

Ngem makunami a saan a kasta ti kalaka ti mangbuangay
iti gunglo. Umuna, kasapulan ti sinsero a panagtitinnulong dagiti
kameng ti media tapno maitag-ay ti pagimbaganda a saan ketdi a ti
laeng bukod nga interes ken pagsayaatan ti sumagmamano. Kasapulan pay
ti pannakikammayyetda iti aniaman a panggep, plano, ken programa ti
gunglo a saanda laeng nga adda iti ruar nga agpalpaliiw wenno
agdaldalikepkep.

Tapno agballigi ti maysa a gunglo, kasapulan ti
involvement tunggal
maysa, saan laeng nga agpatingga lattan ti maysa a kameng nga
umel
a kameng.

Tagtagiiliwenmi daytoy a maipasagepsep kadagiti
agiwarwarnak tapno nabilbilegda pay iti pannakairakurak iti
kinapudno.#

Comments are closed.