Footer

INDAYON NI LAGIP: Iti Likudan dagiti Ulep, Naraniag ti Init (Umuna a paset)

Manong
Danny, nabayagen a kayatko nga isurat daytoy pakabuklan ti biagko
kenka ngem insuratko itan agsipud ta kayatko nga iparaman kadagiti
agdengdengngeg kenka ti aglaplapusanan a ragsakko iti kalkalpas a
Paskua.






Wen, Manong Danny, agpayso ti pagsasao a kalpasan ti
langeb, sumangbay ti lawag. Kalpasan dagiti rigat ken pannubok,
dumteng ti nam-ay ken balligi.

Manong Danny, naiyanakak a maysa a bastarda wenno ‘anak
sa labas’ a kunada. Agtawenakon iti tallo, idi nangasawa ti inak.
Naaddaanda iti lima nga anak.

Manong Danny, dumdumlawak idi gapu ta sabali ti
pannakilangen kaniak ti imbilangko nga ama. No awan ni nanang ta
napan makiraep, mabatikami nga agkakabsat ken ti amami iti balay.
Adayo ti pakiraepan da nanang gapuna nga agbalon ket malemton inton
aggawid. Iti pangngaldaw, idinto a nagadu ti gawen ti amak nga
innapuy ken sida dagiti kakabsatko, kaaduan nga ittip ken digo laeng
ti bagik.

No naliwayak nga aywanan dagiti addik ket adda
garumiadda, wenno mapasangitko ida, pagpaklebennak ni ama ket
agkakanabsiiten ti ablatna. Manonto nga aldaw a saksakitek ti panaas
ti ablatda.

Ammok a marigatan met ti inak iti kaawan ti panangipateg
ti amak kaniak. Pamrayanna laeng ti agsangit no kasdiay nga
ablatannak ni ama. Ngem awan ti maaramidan ni nanang. Pinadasna nga
inanawa ni ama iti naminsan a panangablatna kaniak ket uray la
nagkabbibaw ti subsobna a dinisnog ni ama.

Ngem iti rabii, no kasdiay a nakaturogen da ama, umay ni
nanang iti sagumbi a pagturogak ket aprosanna dagiti naglemmaan ti
ablat. Umdasen kaniak dagita a panangiparikna ni Nanang iti
panangipategna kaniak tapno mapunas dagiti sakit a mariknak.

No kasdiay a madusaak, Manong Danny, pamrayak ti agpakni
iti suli ket sadiay, mangitanamitimak iti kararag nga ikkannak ti
Dios iti pigsa ken kiredko a mangibaklay kadagiti rigat ken pannusa
iti inaldaw-aldaw.

Ad-adda manen a nariknak ti kinabastardak idi agbasaakon
iti elementaria, Manong Danny.

Adu a kaklaseak ti di mangayat a maisurotak iti
bunggoyda. A kasla ketdin dakkel ti basolko gapu ta maysaak a
bastarda. A kasla ketdin, rugitak a dida kayat a dumket kadakuada.

Ngem inanusak dagitoy, Manong Danny. Wen, akuek a
masugsugatan ti riknak ngem masapul nga ibturak ti nababa a
panagkitkitada kaniak. Inkarik ketdi iti bagik a dumtengto ti aldaw a
makalung-awak iti lutlot ken rimbawak dagiti kaklaseak.

Maysa a malem a panagapuk iti pagadalan, nadatngak ti
maysa a lakay iti balaymi. Serioso ti panagpatangda kada ama ken
nanang.

Naammuak idi agangay nga isu ti tatang ti pudpudno nga
amak. Naammuanna kano ti maar-aramid kaniak ket umaynak alaen.

Idi damagen ni nanang no kayatko ti sumurot ken ni lolo,
dagus nga immabuloyak. Ammok a masarakak ti pammateg iti denna ni
lolo.

(Adda tuloyna)