Footer

Oplan Iwas-Paputok, nainget nga inyimplementar ti kapolisan iti Region I

SAN FERNANDO CITY – Nainget ti panangiyimplementar ti
kapolisan ditoy rehion uno iti panangiyimplimentarda iti Oplan
“Iwas-Paputok” a nagtungpal iti basbassit nga insidente dagiti
nasugatan gapu iti paputok ditoy.







Sakbay ti Paskua, imbilin ni PNP Regional Director
Police Chief Supt. Luizo C. Ticman iti kapolisan nga adda iti
babaenna ti naan-anay a panangmonitorda kadagiti aglabsing nga
agpaputok kadagiti maiparit a napipigsa a rebentador tapno masiguro
ti seguridad dagiti tattao.

Kasta met a binallaagan ni Ticman dagiti taona iti
saanda a panangpaputok iti paltogda agsipud ta “diak ipalubos iti
kasta nga aksion ket kitaek a sumango iti maikanatad a proseso dagiti
aglabsing nga adda iti babaek.”

Imbilin ni Ticman kadagiti polis nga ingetanda nga
ipakat ti linteg mainaig kadagiti paputok nangruna kadagiti
highly-urbanized a lugar a nangideklara iti total a panangiparit
kadagiti rebentador ken dadduma pay a kita ti paputok.

Inalerto pay ni Ticman ti PRO1 Firearms, Explosives and
Security Agencies/Guards Supervisory Section (FESAGSS) ti
panangmonitorna kadagiti bodega, pagpartuatan ken paglakuan kadagiti
paputok iti intero a rehion.

Imbilin pay ti regional director iti kapolisan iti
rehion iti panangisayangkatda iti naing-inget nga intelligence
monitoring operations tapno malapdan dagiti kriminal nga aktibidad.
Karaman kadagiti imbilin ti regional director a nainget a masiputan
dagiti pagdudupudopan dagiti tattao a kas kadagiti malls, simbaan,
ken pagsinean.

Imballakad pay ni Ticman ti panagaramat ti
publiko kadagiti alternatibo a wagas a pangpasangbay iti Paskua a
saan ket a dagiti rebentador ken dadduma pay a pyrotechnics.#